青姐胡孟青劈炮唔撈有線之後，接受咗now觀星台訪問，今日會播出街，華華噚日先睹為快，聽佢講吓辭職內幕，以及論盡現時主持財經節目嘅一眾「財經演員」。青姐不嬲唔赦人，喺訪問寸爆近來陷入「廣告新聞」風波嘅亞視首席記者殷莉，青姐話殷莉完全唔識財經嘢，竟然可以主持財經節目講股票，真係笑死街坊，真係名副其實嘅「財演」！
中鋁變成中旅
殷莉搵亞視記者笨，要同事去拉廣告同傾生意，仲喺新聞時段插入廣告雜誌《走進上市公司》內容，已經被全城圍插，鬧佢冇新聞專業操守。
但青姐話，殷莉仲係冇料到嘅「財經演員」；話說有出席節目嘅嘉賓問殷莉點睇中鋁（2600），殷莉竟然用中旅（308）嘅業績圖出嚟向人講解！
華華覺得更爆笑嘅係，殷莉竟然問嘉賓，用日圓嚟做高息貨幣存款得唔得。係人都知日圓家陣冇息，參加過智慧與美貌並重選舉嘅殷小姐，真係有啲自暴其短噃。
青姐又話，「財經演員」呢個名詞係一種侮辱，認為財經主持同演員分別係兩種專業人士，有各自嘅專業知識同技能，唔可以混為一談。
「張栢芝揀樓冇眼光」
除咗一眾財經專家外，唔少名人巨星都靠炒樓致富，好似周星馳、馬榮成及古天樂咁，都有炒旺舖同豪宅賺大錢，之不過，青姐認為佢哋只係屬於少數，好多明星都炒到損手爛腳。青姐又發揮佢寸人本色，暗指張栢芝花超過1.2億買豪宅天台屋冇眼光，有咁多錢應該買House至啱。
張栢芝今年4月斥資1.28億元購入中半山世紀大廈一個連天台單位，以呎價近3.5萬元刷新該屋苑新高，但係之後樓價開始回落，過多幾個月栢芝仲同霆鋒離婚，唔通真係福無雙至？
華華覺得，自從一班明星炒樓同炒股致富嘅新聞傳出後，唔少人跟風加入股場樓市，不過係咪每個人都真係賺錢，就不得而知啦。就好似周星馳自從賣走天比高A屋單位賺大錢後，就被人封為「明星炒樓王」，不過青姐就覺得只係明星效應啫，認為大家只見樹木不見森林，好多明星其實都輸到甩褲，只係收埋唔畀人知。
青姐又質疑，本來呻窮嘅葉翠翠，邊夠本錢可以炒到買兩層豪宅？除非好似係訪問佢嘅節目主持王賢誌（老竇係王氏建港（532）主席王忠桐）咁有本錢，先至有人信！
爆有線高層爭權「插旗」
青姐上月底離開有線財經台後，都冇點講番劈炮單嘢，但佢接受有線對家now訪問時終於爆內幕，佢話原來有線就嚟有高層退休，有人為咗爭權上位而要「插旗」，因此拎青姐節目開刀，借改革之名來加插「自己人」入去，結果評馬靚姐珊翠絲及財經記者蔡展翔兩位新主持加入，青姐唔順氣，於是劈炮唔撈。
青姐話嗰位「最高領導人」以改革嚟做藉口，話珊翠絲識得馬主多；而蔡展翔就識好多廠家，派兩位做新主持，將青姐主持時間縮減到只得逢星期一、五。
李華華
mailto:[email protected]