拿度雄風不再？定係失冠軍、失信心？前網壇「1哥」拿度輸咗美網決賽之後，佢幫名牌Armani拍嘅男士秋、冬內褲系列亦出爐；不過唔知點解，出名虎背熊腰、有前有後嘅拿度，比年初推出嘅內褲「雄風」相，有「縮水」之嫌。
俾Armani睇中拍內褲廣告嘅，都係「有料」之人；對上兩年幫佢哋拍內褲廣告嘅模特兒，都係足球壇「神級」人馬，一個係「靚佬」碧咸，另一個係「靚仔」C朗。碧咸同C朗影底橫照時有冇「裝假狗」就見仁見智，總之出嚟效果激凸，令人無限暇想。
失落美網心情惡劣
今年輪到25歲仔、已經喺網壇攞咗10個大滿貫錦標嘅拿度，年初仍算球場得意時，佢坦胸露臂着住Armani內褲拍廣告充滿信心；不單周身肌肉結實，連佢出名翹嘅屁股前面都仲好有料。拿度拍攝時仲話好享受：「拍呢種照片，對我嚟講係全新經驗，我覺得好正面，好享受過程。」
事隔數月，拿度喺早前嘅美國網球公開賽決賽，對住死敵迪祖高域時，全場被動捱打，結果輸1:3，衞冕失敗，又打到五勞七傷；拿度嬲到大鬧國際網聯冇人性，搞到個個球手有氣冇碇唞，心情跌至谷底。
呢個時候，拿度新一輯嘅底橫廣告相出籠，但俾人感覺就寧舍憂鬱；雖然肌肉依然，但就「平平無奇」！唔知佢係太真，想以真身示人，還是冇心情「裝假狗」呢？總之出嚟嘅效果，就比唔上兩位前輩碧咸同C朗啦！
唔知係咪連攝影師StevenKlein都覺得拿度今勻冇乜睇頭，唔少相都係遮遮掩掩；唔係叫佢趴低就係側身影，寧願影佢八月十五。唔知拿度見到啲相會唔會「反省」吓呢？
