郭富城和女友熊黛林戀情全城皆知，前晚兩人各自亮相活動，熊黛林坦言不介意和城城同場，但不想情侶檔sell客。城城年紀不小，熊黛林坦言想生兒育女，但要看上天及緣份，看來真正要睇的是城城肯不肯生。
熊黛林稍後投入拍攝新片，她前晚及昨日密密出席活動搵錢。熊黛林前晚先和台灣女模白歆惠、謝婷婷等在灣仔出席珠寶展，佩戴300萬鑽飾行騷，更和富豪鄭裕彤傾偈。熊黛林昨日又以代言人身份，在中環為代言的SPA宣傳，她穿上超窄橙紅裙，性感非常，她坦言怕走光：「條裙喺網上買，之後改細，但改得太緊，我都驚走光。」
生日怕咗出街
與一對小朋友玩得開心，問熊黛林可想生？她直認：「我好鍾意小朋友，不過恨唔到，呢啲要睇緣份，係上天送嘅禮物。」她和城城前晚各自出席活動，熊黛林坦言不介意合作：「有客戶搵，可以考慮，工作上有共識，主要係睇品牌囉，不過唔想叫情侶檔，想叫合作多啲。」
下月生日，問到準備如何慶祝？熊黛林說：「最想喺屋企靜靜地過，每年都有好多人跟住，好辛苦，食飯都唔安樂。」在屋企打邊爐？她說：「屋企唔夠大呀！」提到工作，她將在新片飾演盲妹，近日去了盲人學校，戴眼罩學行路及活動。此外，張栢芝早前接受訪問，謂想再婚及再生，謝婷婷前晚大表贊成：「好呀，越多越好呀！」
捐電單車行善
前晚城城在中環出席活動，獲大會送了價值28萬8千元的電單車，他再捐出拍賣，為UNICEF籌款。他謂沒電單車牌，靚電單車可以放家中大廳收藏，或運到上海賽車用。城城當年和熊黛林拍MV撻着，正是有火紅電單車，問他有新車可會載熊黛林？他初時支吾以對，表示只可坐一個人，後來才說：「考慮吓。」
採訪、攝影：盧妹、魯萍、張俊銘
