在很久以前遙遠的銀河系，有位導演叫佐治魯卡斯，一套《星球大戰》拍完又改、改完又拍，沒完沒了拉扯34年，信徒卻日積月累至千萬！萬眾期待，聖典終於升級成藍光版，1080p執得靚到似新戲上畫，更將《前傳1》由木偶扮演嘅尤達大師，以CG重新打造，唔再似小魔怪上身。
記者：徐影龍
攝影：黃子偉
Model：Rika@GME
為《前傳1》平反
由藍光制式推出一刻，《星戰》迷可謂餓足六年，期待佐治魯卡斯再顯神通。今次藍光版分三種包裝，包括《星戰前傳1-3》、《星戰4-6》及集齊全套再加Bonus嘅9碟裝，前兩者行貨售價$499，而9碟裝就賣$988。平少少兼多3隻碟，所以旺角信和同灣仔188，都係9碟裝賣得最厲害。
聲畫高清重現，《星戰》果然無令人失望，升上1080p，畫面細致線條實淨，比我翻煲又翻煲嘅480pDVD實在好得多了，望住1977年已出現嘅影片，今天居然俾佢修復得妥妥貼貼，尤其曾被Fans罵得最兇嘅《星戰前傳1》，嚟到藍光版終於似番樣，好似配啱眼鏡度數咁，成個畫面又Sharp又醒，直逼以數碼拍攝嘅《前傳2、3》。魯卡斯出手修復當然唔止推高解像度咁簡單，不但大量顏色Tune番靚，好多場面亦作出改動，最明顯係《星戰1》入面，尤達大師仍以木偶嚟扮演，可惜造型太樣衰，差啲以為睇緊史匹堡套《小魔怪》，幸好嚟到藍光版後以CG重新打造，切合番《前傳2、3》個造型，兼且表情多多，即時順眼靚仔番晒。
惡搞片段笑足成粒鐘
睇完高清星戰，意猶未盡嘅仲有大把「甜品」俾你欣賞。9碟裝有成3隻BonusDisc咁多，內容接近40小時，實在相當嚇人。其中兩隻BonusDisc，就分別收錄《星戰1-3》及《星戰4-6》嘅Making內容，包含製作花絮、刪除片段、360°戰艦飛艇觀賞等環節，雖然部份片段喺舊有DVD已出現過，但藍光版可當作一個總合整理，一次過儲齊晒。第三隻BonusDisc就較精采，包含世界各地星戰活動同事件，最過癮係惡搞片段，收錄唔同媒體借星戰人物搞搞震嘅短片，如醜化拿卜星公主、黑武士出術打Golf、尤達喺錄音室搗亂等，近一小時長度笑個不停，大可當另類笑片睇都得。
今勻高清製作，尚算令人滿意，唯一要彈係港版後期製作。字幕沿用DVD版，繙譯上錯照錯、怪嘅就依舊怪。六集「講評聲軌」以及BonusDisc1、2不設中文字幕，得Disc3有番中文。九塊膠盒相互間只以薄薄膠紙黐住，唔夠兩日我套碟已經甩出嚟！盒底碟名第三同第六集一樣，明顯係Copy&Paste嘅慣性犯錯。睇嚟都要等明年3D版推出後，再掏錢儲多一次喇。
絕地小魔怪
舊版將堂堂絕地武士變成小魔怪，幸好CG化後嘅尤達靚仔番晒。
巨石無中生有
逃走一幕，場景加入更多大石遮蓋R2-D2，增添不少匿藏氣氛。
場面更宏偉
基地門口變闊拉大，再縮細兩個機械人，令場景望落更壯觀宏偉。
近鏡變遠鏡
抹掉舊有近景Shot，無中生有變成遠鏡，門口再加雷射防護罩。
