陳啟宗打骰嘅亞洲協會聯同畢馬威，噚日擺下擂台陣，請咗港交所（388）、新加坡交易所同孟買交易所嘅行政總裁同台較量。牌頭有幾勁，但火花就唔多見嘞。
陳啟宗第一條問題相當尖銳，問大家點睇交易所之間嘅合併收購活動，「我哋首先請Magnus（新交所首席執行官麥尼思．博可）講吓點解買澳交所，然後再請Charles（港交所行政總裁李小加）講吓佢哋做錯啲乜嘢！」實行燎起個火頭。早前新交所曾經以87億美元向澳洲交易所提親，但失敗告終；而港交所就一直話無併購計劃。
Magnus接招時就話，交易所之間嘅併購活動係大勢所趨，可以助長業務增長，減低成本，「呢個只係時間同機會嘅問題」，而與澳交所合併交易失敗，主要係澳洲本土政治環境困難所致咁話。
李小加就冇火上加油，維持冇需要併購嘅觀點。佢話所有人都想尋求增長，而港交所作為全球市值最大，擁有良好價值嘅交易所，仍有好多增長空間，所以冇需要走到海外併購囉。