大家都知SOHO中國（410）主席潘石屹向來鍾意寫博客，近日佢又筆興大發，洋洋千幾字撰文同粉絲分享，談及嘅當然係近日大家關心嘅話題，好似全球經濟氣氛疲弱，強如中國最近也面對唔少問題，潘總提到，目前內地經濟最薄弱嘅環節就係中小企，其次就係地方政府。
滿意SOHO售樓收入
華華又好替佢哋發展商擔心，潘總就叫大家唔使驚，「開發商還沒有死，穿單衣服的先死了，開發商還穿着棉衣呢……」唔知佢自己係着棉衲定羽絨呢？
潘總話，內地發展商09年銷售額3萬幾個億人仔，舊年更進一步增加到5萬幾個億，錢會慢慢回籠，所以佢認為發展商死唔去，皆因佢哋嘅資金鏈仍然唔錯，而SOHO今年以來，售樓收入近100個億人仔，潘總都相當滿意。
潘總又話，之前內地政府官員搵咗佢去開會，講咩？兩樣嘢，第一，梗係叫發展商要積極承擔社會責任，去建設保障性住房啦，第二，就係好明確咁話畀佢知，限購政策堅定不移，而且係一個長期政策咁話。所以潘總認為，內地樓市宏觀調控應該會更嚴格，其中大城市嘅住宅市場，好似北京、上海咁，調控只會更加嚴格，大家有意北上置業嘅，收到啦。當然近日天氣轉凉，要北上真係要帶番件棉衣。
李華華
mailto:[email protected]