電動車零排放！好環保！政府勁Sell用全電動車，可惜充電配套不足致未能普及。smartfortwoelectricdrive是首部歐洲電動車供政府長測而殺入香港，相約在將軍澳試駕，公關千叮萬囑唔好玩太耐，怕唔夠電返中環，smart之選似乎要政府smart啲才可更上一層樓。
記者：許維雅
攝影：王文忠
Model:AnnieG@GME
網頁：http://hk.smart.com
四年試驗計劃
眾人皆說電動車是未來大趨勢，綜觀各歐美日車廠的研發步伐，似乎日本車廠稍早着先機，日產Leaf及三菱iMiEV之前已在港進行長期測試，更已進入量產，接了不少政府部門及大公司定單。今日終於輪到歐洲車廠發力挑機，雖然smartfortwoelectricdrive仍未正式量產，但仍然是首部供政府長測的歐洲電動車，20部到港實行為期四年試驗計劃，並將會借給中電、港燈及賽馬會等機構。
扭力大起步爽
電smart以新一代smartfortwo的車身作藍本，外形完全無分別，原先置於尾箱底部的引擎就換上一台30kW電磁推動的電動馬達作動力輸出。性能方面，電smart可即時產生120Nm扭力，0-100km/h需要6.5秒，比汽油版smart的92Nm扭力還要大，所以起步更爽快，但不可以轉數催谷力量，後段感覺平穩均速，極速限於100km/h。
充滿電行135km
毋須用油，以鋰離子電池推動的電smart，跟一般電車一樣是透過220V標準家用三腳插座充電，將電線槍插入插座，再大力一按火牛上的On按鈕，紅燈亮起即代表開始充電，錶板上的充電燈標記亦會同時亮起，8小時就可完成100%充電。想停止充電，只要按火牛上的Test掣，代表Off後可拔掉插頭，鋰電池亦可隨叉隨停。據廠方數據，若電池充滿100%就足夠行135公里，中控台上原本用來顯示轉速的小鐘就會改為顯示電池用量%，不過唔會好似其他電車咁，有顯示話你知仲有幾多公里可以行。
香港經常塞車，加上少少電量折扣，保守估計可行約100公里，大家可用顯示100度的電池用量錶作評估。由鰂魚涌車場來到將軍澳蘋果大樓約16公里左右的路程，電池錶就顯示只剩80%電量，誤差尚可接受。不過電smart唔可以快速充電，所以拍攝時都唔敢玩太耐，但就幾欣賞充電插頭有防盜設計，只要離開時鎖車，插頭就會自動鎖實插座，可放心於商場充電。另一貼心設計就是電池萬一不幸耗盡，可以有一次再着車行兩分鐘的救命機會。
