諸葛紫岐和Neway細少薛嘉麟明年結婚，早前Neway疑有員工揚言撒溪錢送客，Neway未來新抱諸葛即時為夫家講好話，頻呼誤會，又大讚員工，更自薦做代言人。同場楊千嬅就指員工寸嘴勞氣，證明香港人工作壓力大，但講明遇上同類事件，必影相放YouTube，公諸於世。
楊千嬅、薛凱琪、諸葛紫岐和蔡詠恩（Evelyn）等，前晚在灣仔出席品牌A.TbyAtsuroTayama秋冬時裝騷。Neway早前發生收費糾紛，擬員工揚言撒溪錢送客。諸葛紫岐和Neway細少薛嘉麟明年結婚，她昨日為未來夫家大講好話，十分識做。
「係專業團隊」
諸葛紫岐說：「都係誤會嚟㗎，卡拉OK一直生意好好，服務好好。」男友擔心？她說：「做呢行一定有投訴，佢哋係專業團隊，我好支持唱卡拉OK。」她不斷指事件已解決，儼如發言人，問她可想做代言人？她即不諱言說：「我都想，最多收平少少。」男友家族生意都要收錢？她說：「公還公，私還私，心裏支持，錢要照收。」
其後問到婚禮，諸葛紫岐指明年擺80至100圍，但場地未定，婚紗會自己設計。她又指剛過去的中秋節，男友陪她去北京見父母，自己也有和男方家人吃飯團圓，問她有否見到陳法拉，她則不肯多講，只強調兩人是無事。
千嬅：咁寸嘴
對Neway事件，同場的楊千嬅則有點不敢相信，更以為是萬聖節宣傳噱頭，得知是投訴後即說：「咁寸嘴？咁勁？係咪（員工）平日做嘢好辛苦？香港人工作壓力好大，好似拍戲咁。」問她遇上同類事件，如何解決？她即說：「即刻用電話影低佢，YouTube見啦！」
此外，Evelyn和前度男友Tom甩拖不久，Tom即跟她的好友、陽光妹何思諺閃孕和閃婚，Evelyn說：「我好開心，我係第一批被通知，一個月前已經知道。BB出世後，我會好錫佢，佢哋係我最好嘅朋友，我恭喜佢哋。」更表示寧願做BB契姐多過做契媽。
採訪：盧妹
攝影：黃偉雄