鳥山明筆下嘅《龍珠》Hit足二三十年，連歐美鬼佬都中晒毒，所以每逢有新OVA或新Game，都造成不少話題。最新《龍珠Online》，本港Fans足足餓咗三個月先玩到，結果係，玩家在討論區上扯晒白旗兼大吐苦水，仲講明如果唔玩TeamWork就過唔到關。咁惡打咩？好，又等我落場試玩。
記者：陳國輝
攝影：楊錦文
LV38升爆變超級人類
謎團之一，唔少Fans話升到LV38已經「爆呢」，即使行埋成人禮，變做金黃色頭髮嘅超級人類，但單拖就係打唔贏無限供應嘅小嘍囉，點算？據代理解畫，其實《龍珠Online》一直在擴展階段，例如現時故事只係玩到打菲利，至於人造人、斯路以及魔人布歐呢班後來登場嘅人物，仍在努力趕工，若然你屬即日爆呢嘅狂人，不妨組隊到天下一武道會跟其他高手過住招先！
另外，小記亦見識過單拖闖關嘅慘烈場面。例如示範以時光機回到悟空大佬出現嘅地方，中途要過五關斬六將，然而單憑一己之力，確實好難抵禦無限出現嘅敵人圍攻；代理話好需要TeamWork合作補給，前排和後排攻擊，否則俾你升爆LV38一樣好難過關。
鳥山明最重視劇情
叫得《龍珠》，當然好想參與故事內嘅經典場面！但由於版權問題，玩家只可在新增設嘅人類、那美星以及魔人角色當中，挑選其中一位。另外，大家亦好想知，究竟鳥山明先生最看重哪一部份？據講，佢最關心其實係新角色與原著劇情之間嘅連繫，例如玩家點解會遇上悟空、無限、天津飯；同時又為何要坐時光機，幫手打敗比達、菲利等壞蛋？以上每一個疑團，大家玩過後就一清二楚。
另一最大特色，當然係揀職業、買道具同埋升呢打大佬！由於《龍珠Online》結合咗原著，所以Fans更加期待可獲得同故事有關嘅物品，例如仙豆、變身膠囊等等。但據代理方面透露，原來玩家最鍾意係收集杜拉格斯套衫，仲睇住佢由細路仔着到變成大人！相反，悟空、無限同阿樂呢批「龜仙流」門徒，佢哋嗰件黃色襯藍腰帶裝束，似乎就唔係太受歡迎喇。
平台：Windows
類型：MMORPG
開發：Bandai&NTL
代理：紅心辣椒
售價：$15（普通版）、$499（特別版）
網址： http://dbo.wasabii.com.hk
