現年31歲嘅台灣G奶天后蔡依林（Jolin）拍MV撻着27歲嘅混血模特兒錦榮，拍咗拖年幾，近日傳感情亮紅燈，因為錦榮被踢爆同香港模余曉彤（Hidy）影埋啲頭貼頭嘅親密相，唔知係咪咁Jolin打翻醋埕，噚日佢喺台灣出席公益活動時，被問到有冇結婚念頭，佢答：「如果遇到好對象。」唔通錦榮唔適合付託終身？佢即大耍太極：「不要這樣子啦！」
婚期提早
日前Jolin接受雜誌訪問已表示想40歲前完成結婚生仔大事，噚日佢現身，再被追問幾多歲想做媽咪？Jolin突然改變心意：「希望不要超過35、36歲。」雖然傳感情有小風波，但Jolin日前去完南京開演唱會，返到台灣即刻同男友一齊睇戲，問Jolin點解咁黐纏，佢話：「希望大家專對公益活動問題發言。」
另外，錦榮噚日都喺台灣出席牛仔褲活動，佢原先認為40歲係最好嘅年紀結婚，但聽到Jolin改口，佢即刻婦唱夫隨話：「35歲也是個很好的age。」活動上有小朋友表演舞蹈，播嘅歌係Jolin舊愛周杰倫嘅《牛仔很忙》，錦榮表示：「我不知道是他的歌。」擺明唔畀面周董。