曼聯嘅揸弗人格拉沙家族向來手指冇罅，領隊費格遜要三跪九叩，先喺佢哋嗰度攞到錢買人。不過，呢個孤寒財主卻轉死性，仲變身成財神，破紀錄咁向超過500個紅魔職員大派500萬鎊（約6,100萬港元）花紅。點解突然咁豪？之唔係曼聯成績好業績好囉，身為老細，梗係要有點表示啦！
曼聯喺上季歷史性咁第19次成為英頂級聯盟主，兼且喺4年之內第3次打入歐聯決賽，又喺上個財政年度錄得破紀錄嘅1.109億鎊嘅盈利，真係憎死車路士、曼城、阿仙奴同埋利物浦。咁到未算，今季佢哋喺英超頭5場全勝，仲要大炒阿仙奴8:2同埋輕取車仔3:1。成績同業績都勁成咁，佢哋嘅美國老細格拉沙家族亦有啲表示，喺前日去信畀班職員，通知佢哋喺下個月份糧度，會有相等於年薪7.9%嘅花紅。
換句話說，年薪200萬鎊嘅紅魔行政總監基爾，就會收到158,000鎊嘅花紅；至於其他高層好似營運總監保連布、員工主管活禾特同埋董事局成員艾度臣，收到嘅花紅數目同基爾差唔多，都係15萬鎊左右。
520員工瓜分球員冇份
查實自格沙拉家族喺03年入主曼聯後，紅魔盤數俾佢哋揸得好緊，莫講話花紅，人工都好少加，有球迷仲形容佢哋係吸血鬼家族。所以格拉沙家族今次肯大破慳囊，簡直係皇恩大赦。但係，呢次花紅計劃唔係人人受惠，球員就肯定冇得分。分紅嘅大多數係奧脫福球場、卡寧頓訓練場同埋倫敦寫字樓嘅員工，全部620個職員中，大約有520個員工有份分花紅，算係皆大歡喜啦！
格沙拉家族轉死性厚待啲員工，若然紅魔喺今季成功衞冕英超兼重奪歐聯，屆時班球員肯定發過豬頭。另外，原本因傷唞兩周嘅小豆查維亞靴南迪斯，唔知係咪食咗仙豆，竟然可以喺周三復操。