地產A請傳媒吃飯，傾吓市場近況，一位老總乘機問佢：「點解九肚山幅地皮賣得咁平，你地唔舉手呀？」老總A話：「我地研究過嘅，嗰幅地有幾點令發展商困惑：（一）限量起不得少於九百七十個單位，如果在九肚山賣五六百呎住宅單位，市場在邊度？（二）車位少，好多住客會冇車位。（三）公共交通缺乏，將來頂多行綠色小巴，條路窄，巴士不宜。（四）邨巴又點？運輸署早已收緊邨巴發牌，將來發牌無保證，（五）地皮之前有另一幅土地，將來如果又係起限量單位，樓高二三十層嘅話，目前嗰幅土地上之樓宇會冇晒景……」
總之就係百彈，政府揀九肚山嚟興建限量單位，又的確係違反邏輯嘅，在南昌街西鐵上蓋限量，當然冇問題，但何必揀在九肚山？
講起建築成本，地產A話早已冇二千蚊一呎嗰支歌唱，包裝豪宅，閒閒地都要四千蚊一呎！左丁山忍唔住講：「政府希望樓價平，你地起清水房，盡量節省成本得唔得呀？」地產A答：「你講呢啲嘢，證明你同啲高官大官一樣，全不知道市場需要，自己主觀咁諗出嚟，就以為香港人接受。唔係㗎，香港人買家，內地人買家，買樓時就係要睇埋建築材料，各種家庭用品（如廚具）嘅牌子。我地起清水房容乜易啫，建築時間仲會縮短㖭，但推出市場後，買家唔要買，你左丁山或政府同我包銷呀？」
又講吓上車盤與大單位，地產A指出呢十年來，以換樓盤最受歡迎，上車盤（四至五百呎）反而唔係咁啱，所謂換樓盤，就係指三房、四房單位，一千呎多啲嘅，因為好多香港家庭住在早已供滿五至八百呎嘅樓，儲蓄豐裕，好想二房換三房，三房換四房，佢地換樓之後，騰空出嚟之一房、二房細單位就會成為二手上車盤，譬如沙田第一城就不斷有人換樓搬出，亦同時有大把人搬入，就係呢個道理。二手上車盤會便宜過一手上車盤，更容易為年青夫婦負擔，偏偏政府聽埋一啲外行人講，不鼓勵興建大單位，竟然要搞限量，限呎，根本就係胡亂干預市場！