「楊過同小龍女愛情，有幾偉大啫！」說這話的，是性學大師吳敏倫。以為佢性學勁，點知講起愛情來仲勁，而且實踐上迹近無敵──21歲那年寄信到雜誌徵友欄，從中取一，雙方來信回信沒有五封吳敏倫就示愛了，他還瞞着父親，飛越南見這女子，只見過兩面，最後更把她娶回來。40年過去，二人感情依舊，難怪他牙擦擦。
記者：何兆彬
訪問攝影：陳陶鈞
聽吳敏倫的愛情故事，記者即時想起的，是張無忌中了玄冥神掌，半死的他跌落懸崖，非但沒死，還從尺許小山洞中鑽進世外桃源，又意外地習得《九陽神功》，之後一生幸運快樂。他一聽馬上說：「哈，我細個讀愛情小說還會感動，因為當年沒有愛過。後來就覺得一來好假，二來都愛得唔夠深！」他連經典《神鵰俠侶》都踩：「如果愛得夠好，小龍女唔會離開楊過的，係咪真係要離開楊過佢先會食斷腸草？如果我係楊過，為了老婆開心，我會食！橫掂小龍女都快死了，倒不如等她死了，我才尋死，讓她死也死得開心！而且即使她死，我也不必跟她一塊死，死了沒有為愛情增加半分的。」
他幸福半生，中外最經典的殉情故事，在他眼中都愛得不堅定，「例如《梁祝》，只要愛情堅定，就算祝英台要嫁他人，你會知道我仍然愛你，我們亦可以私奔。即使為了孝沒私奔，但為愛情，我一定會犧牲父母！如果你說，父母見我同佢一齊就會尋死，那好，我們就等他五年十年，反正父母會比你早死，若愛堅貞，五年十年又算甚麼！」聽吳敏倫批評愛情小說，像個愛情教主，但問起他愛情史，他會老實告訴你：「是愛情救了我！未識我老婆我好頹廢，我覺得這世界沒有好人──男人叻的好驕傲，水的自卑；女的嬌生慣養，諸多作狀，所以當年我讀醫，覺得人類有乜好救啫！但識了我老婆之後，這世界至少有一個好人！原來世界有得救喎，咁我就有心機讀書。」
吳太沙龍照
三級情書
他出身中上家庭，父親是語言學家，算是書香世代，年少時吳敏倫其實是個文藝青年，「父親樣樣都給我自由發展，但他鼓勵我讀醫科，他說讀藝術聽乞食。為了滿足老竇要求，我讀了醫，如果俾我揀，我一定讀音樂！」1971年，他進了港大醫科，「成績麻麻哋，我夾硬讀之嘛！結果有一科肥佬，要留班。你要我留班，我仲得閒啦，但玩音樂的朋友都出國讀書了。本來我把徵友信寄去陳浩才主編的《音樂生活》，但它沒有徵友欄。第二封，寄了去另一本雜誌，被登出來但把我地址登錯了；到《星島畫報》已是第三本了。」結果這一封登了，收到一些回信，他卻一封都不回，「我看看就覺得他們好扮嘢！」一年後，竟然收到一封由越南寄來的信，回信後，譜出了這段絕世姻緣。吳敏倫在新書《至性至情@3033》登出多封情信，可惜沒有登徐梅回信。喂，點解收到咁嗒糖？「她第一封信也沒說甚麼，但她字靚，文筆好，又真誠，最緊要係佢唔作狀，好真心好簡單。」點解幾封信就示愛，咁狼？「咁佢真係正嘛，無執輸，追咗先！」他說當年身邊大把女性朋友，「其實女仔知你讀醫科唔慌無人追你！但講幾句，我就知你作狀，唔識又話識，想投我所好！佢（太太）都唔係好識，但佢唔會作狀。」信寫寫吓，吳敏倫仲飛埋去越南見愛人，第一次見面就摸摸親嘴嘴，想進一步，但死忍，回港後大膽了，在信中加入性慾內容，可惜書中把二級半內容全部刪掉，「愛情裏面梗有性，寫寫吓，我梗係會寫我想同你做乜！如果登出來，就變成三級了。」香港不是很開放嗎？「你以為啦！我好多敵人，出位少少實有人投訴我。我成日鬧啲宗教團體、八股佬……」見面第二次，小情侶就共赴巫山，但博士對婚前性行為的觀點其實比想像中保守：「我當然唔反對，但人總要自制。避孕唔係100%可靠的，你知道冒幾多險，可以先做！就算個套失敗，你都要有Plan，萬一有BB你會亂晒龍，咁你就唔好做！」
夫妻相處金句
1.「如果你唔贊成一樣嘢，例如話買樓，咁應該話你唔贊成，但好多夫婦會話：你蠢唔蠢啲呀！」
2.「夫妻爭持不下梗有的，這表示這件事沒有絕對對錯，再拗都無意思。咁可以問投資專家，但投資專家都信唔過啦！咁點呢？咪是但囉，抽籤囉！橫掂都無人知。」
3.「以前無電話，實有約錯地方，好多夫婦一見番面就鬧交。但佢一個鐘唔出現，好可能交通意外死咗喎！見番佢應該攬住佢錫！」
4.「我兒女都找我做感情顧問，我有一直幫佢Mon住，因為感情好一定要性情好，但即使我兒女好，都只係一半，另一半唔係我教嘅嘛！」
40年婚姻不是運
筆友變戀人，此情此景，今時今日叫「網戀」，吳：「當年身邊都大把人講：筆友？係咪呃人㗎？當年我不覺得自己大膽，哈，你唔博邊有收穫呀？」翻開報章，驚見「英漢網戀赴菲求婚被殺」點睇？「咁你自己衡量吓安唔安全囉，如果乜都驚，不如擔心過馬路被車撞！如果我留在香港，好可能一世都搵唔到（老婆）！事實證明我是對的，過了這麼多年，真係無一個女人及她一半！」如此肉麻，記者聽得有點冷震，但吳太徐梅聽慣甜言蜜語：「我22歲時，我們十兄弟姐妹中，阿七八九開始交筆友，我仲話佢幼稚！點知過了兩星期，我就寫信畀佢。」覺不覺得這段情只是有運？「係咪運呢？運總有影響，但好多人以為結了婚就完，梗唔係啦，我一路有做嘢。其實大部份人運氣都差不多，都中唔到六合彩。問題係運來時，你有無珍惜佢，我哋故事中好多轉折點，只要信心稍減，你就做不到了。畀着第二個人接到這封信，見是寄自越南，覺得咁遠係無米粥喎，將封信丟咗佢，咁就無了！」愛情可以賴運，但40年婚姻絕不是運。師傅大人，怎樣可以找到好婚姻？「找伴侶，一定要找性情好的，她對你好是不夠的。」記者挑撥離間──找老婆找到越南，是否港女都有問題？「性情好的男人都一樣難搵！性格唔好的男女都多，因為社會風氣、引誘多啦、自制力唔夠，教育只教你求生技能，沒教你求愛技能！雙方都咁自我，自然越來越難頂啦！」
性同愛兩樣都要有
性學專家談情比談性更多更驕傲。「性學專家其實也需要是愛情專家，好的性技術，只是安全負責任的技巧，在這後面要有負責任/安全的愛。好多人以為自己有性問題，但一搵我就知道係愛情問題。有病人不舉，驗過身沒問題，性技巧又唔係差，原來他一見老婆就憎！這些Case只要一搞好夫妻關係，他性能力就回來了。」但調番轉，太愛對方又唔得喎，「有男人太關心對方，想百分百滿足到老婆需要，一路做就一路問：我咁Kiss你好唔好，我咁摸你好唔好，結果老婆無晒Feel！性其實是藝術，等於練琴，你一上台就唔可以顧住啲手指。」書中，吳敏倫同事李維榕教授大爆：「性學家大都拋妻棄子，娶了年輕的女助手或弟子為妻，吳敏倫是絕少見到專一例子……」吳敏倫哈哈大笑：「好多人做性學都係解決自己的性問題！」
夫婦恩愛40年自然好，但總有一天會分離，「若有一天誰先去了，怎辦？我當然不會死啦，第一，我知道她不希望我死，二，我們愛過嘛，已經擁有過，我還要證明甚麼呢？若說剩低的人好痛苦，但這些痛苦相比下，算甚麼呢？快樂了幾十年，不管發生甚麼事，都沒有資格去投訴上天了！」訪問前，心諗吳博士係咪想晒命？見面後找到答案：「有人話愛情沒有天長地久，我覺得好可惜，只要你不再相信，跌多個徐梅畀你，你都唔會同佢講天長地久。社會太功利，只教數理化，唔教修養。其實性同愛兩樣都要有，性技巧要學，都要有愛支持嘛！我出這本書，是給人一個希望。」張無忌告訴我人人都學得曉九陽神功，至於你信不信呢？我套《X檔案》說一句：IWanttoBelieve！
