黃應士（吉叔）係香港電子傳媒教父，老人家縱橫傳媒近五十年，威水史點只停留喺電子媒介。原來吉叔幾十年前由美國回流返香港，曾經喺一份英文報章做採訪主任。當年貪污成風，唔少記者都好似家嘅大陸行家咁，做採訪時收紅包。吉叔最近喺一個傳媒操守論壇上憶述，嗰陣有大財團主動向佢送上紅包，吉叔一於拒收，仲向財團講明，如果你再送紅包畀我，我會將你送紅包嘅事寫埋出嚟！吉叔話佢應該係全香港第一個拒收紅包嘅記者。吉叔認為要改善內地記者收紅包嘅惡習，首要係大幅增加記者人工。佢話當年如果唔係港督麥理浩大幅增加公務員人工，貪污風氣邊會咁快改善？整多幾個ICAC都冇用啦！