兩個人拍拖，如果唔結婚，分手可能係最有機會發生嘅結局。大家唔好誤會，華華唔係寫緊愛情專欄，而係講緊數碼通（315）同全球大型流動通訊商Vodafone嘅關係，皆因數碼通噚晚宣佈，12月開始將用返「SmarTone」個品牌，取代「Smartone-Vodafone」作為商業名稱。
數記總裁黎大鈞話，「以往嘅合作曾經對雙方有利，但近年彼此方向唔同，經長久嘅討論後，雙方同意各自向自己方向發展。」讀起上嚟，十足十娛樂版成日見到某某同某某嘅分手宣言，唯一唔同，分手宣言臨尾多數有再見亦是朋友（或者共同撫養個BB）之類嘅客套說話，但黎總今次並冇咁講，唔通大家終於搞清楚，當日係因誤會而結合？
其實數記係響05年宣佈同Vodafone結盟，仲推出「Smartone-Vodafone」品牌，當時市場曾經憧憬Vodafone會收購數記，結果呢？就係數記因iPhone大翻身，唔使靠人，股價仲多次創歷史新高。