勇奪威尼斯影后嘅葉德嫻（Deanie）回港後一直馬不停蹄出席活動，噚日佢接受車淑梅訪問時提到圈中兩個「囝囝」，對於儼如契仔嘅劉德華，Deanie指華仔係佢眼中嘅明星，仲大讚新抱仔朱麗倩冇得頂，佢話：「人又叻煮餸叻，待人接物又好，同華仔非常匹配。」
安仔好愛Sammi
Deanie又話喺音樂上，至今覺得同許志安合作最夾最舒服，佢形容安仔嘅音樂造詣出神入化，對於安仔同鄭秀文復合，佢就話：「經歷咁多仲可以一齊係天作之合，安仔仲同我講，話好鍾意好鍾意佢（Sammi）。」
除咗演戲了得外，大家都知Deanie係唱得之人，佢再重提自己首名曲《赤子》背後曾發生不開心嘅經歷，佢話當年羅大佑邀請佢去錄音室參觀吓，點知就拎咗隻《赤子》畀佢試吓錄音，仲即晚搵埋林夕執吓啲歌詞，搞咗成個通宵Deanie都唔滿意錄成品，就同羅大佑提議搵日再錄，點知對方喺佢唔知情下出咗首歌，令佢要終止兩人嘅友情，佢仲話若果今日再遇到羅大佑，會直接問佢點解咁衰格。