我求大俠最憎人哋做嘢唔勻真，周日喺拉斯維加斯舉行嘅WBC（世界拳擊理事會）輕中量級拳擊爭霸戰，衞冕嘅美韋達第4回合技術性擊倒奧鐵斯（VictorOrtiz），贏出第11個世界冠軍，連勝紀錄增加到42場。雖然係咁，但佢贏得好唔光彩。奧鐵斯喺呢個回合不停出拳進攻，逼到美韋達去咗擂台角度捱打，奧鐵斯呢個時候用頭撞對手，被拳證判罰技術犯規；正當呢位24歲小子上前saysorry時，比佢大10歲嘅美韋達喺兩人行番台中央準備再戰之際，老羞成怒以左右兩拳將奧鐵斯打到瞓地，再冇還擊能力，拳證由1數到10，佢都起唔到身，結果美韋達就咁贏咗，不過全場噓聲不斷，話佢贏場拳，輸晒品。
其實贏輸都好，體育精神最緊要，我求大俠認為就算美韋達仲係咁冇品，再贏多幾個世界冠軍，都唔會有人認同佢係真正嘅拳王。但美韋達仲死雞撐飯蓋：「我俾佢打成咁，我都冇喊、冇投訴，對手亦都冇投訴我。」堂堂世界冠軍，仲要死唔認賬，真係冇眼睇，反而輸家奧鐵斯答得大體好多，贏晒同情分：「世間上冇人係完美，今次我上咗寶貴一課。」