【本報訊】「撒啲溪錢，撒啲鹽，送客走！」開生日派對被人撒溪錢送客，氣難下。黃先生一行11人昨凌晨到旺角中心Neway卡拉OK，為太太搞生日會後，因賬單問題與職員發生爭拗，警員到場調停不果。Neway拒收錢表示要訴諸法庭追討，黃一方無癮離開之際，竟聽到職員嗌咪，要撒溪錢送客，眾人勃然大怒，聲言追究到底。記者：溫文學
黃與家人朋友等一行八人，前日傍晚6時半到旺角中心五樓Neway卡拉OK，為太太舉辦生日派對。其間職員推介一個價值2,500多元八人套餐：「職員話個套餐已免人頭費，送酒水。」其後再有三名朋友加入，至昨凌晨5時許，眾人盡興埋單，職員拿來一張4,600多元賬單，黃認為不合理與對方理論，他指職員耳語後，將價錢減至4,300元，他們不肯就範，職員再降價至4,080元。
但黃某查單後，發現賬單中有500元是後來三人的人頭費，部份叫了小食「甩單」仍計數，認為應再減去兩項不合理費用才對，但職員堅持要他們埋單，否則報警求助。「有個職員更聲稱，報咗警就唔係呢個價」。黃不滿Neway價錢一時一樣，雙方僵持個多小時無果，至清晨6時20分，黃報警求助。
職員：我哋會循民事索償
兩名警員接報到場調解，曾勸黃氏先付4,080元，事後再向消委會投訴，但黃堅稱價錢不合理，職員亦不肯讓步。一名高級職員突然拋出一句：「張單唔使埋啦，我哋會以法律途經，循民事索償，不過法律費用亦會向你哋追討。」黃覺得自己沒有理虧，心忖：「睇吓法官點判。」眾人遂收拾物品離開。當他們步出房門時，突聽到喇叭傳出一把男聲，「有人嗌咪話『撒啲溪錢，撒啲鹽，送客走』當時卡拉OK只得我哋一枱客，分明是針對我哋，話晒係生日會，咁樣單單打打咒罵，係好唔尊重，好冇禮貌，亦好唔專業」。當時眾人怒火中燒，黃更向在場警員投訴，要求警員協助找出「嗌咪者」，但警員只好言相勸，最後亦列糾紛案處理，無人被捕。黃指摘Neway收費不清，職員肆意辱罵客人更不該，要求公司道歉。
Neway客戶服務主任阮浩文，承認分店職員與事主就賬單金額交涉時，曾就價錢作調整，惟未達共識，公司最終決定循民事追討。阮認為是個別事件，由於會循法律行動處理，故不便評論。對於「撒溪錢」指控，阮回應稱：「未搵到當事人（職員）了解」，但強調不信有職員開咪說以上說話。黃先生昨晚再去該店交涉，並向職員交付4,080元，「畀錢只係唔想俾人話我哋食霸王餐，要求有關職員道歉，追究到底」。
執業大律師陸偉雄指，事件屬服務合約糾紛，若卡拉OK認為金額不當，有權不收取賬單款項，可循民事追討。至於「撒溪錢」說話，屬惡毒咒罵，「似洩憤多過恐嚇」，不構成刑事罪行。
若客人認為說話令他不安，理論上可向卡拉OK索償，但不易量化到損失。
Neway賬單糾紛示意圖
1〉黃先生一行八人唱K慶祝太太生日，點了八人套餐，其後另三名友人加入
2〉結賬時事主指賬單「貴咗」，與職員理論
3〉雙方爭持不下報警，Neway決定不收錢，改循民事追討
4〉其間有人走到房間開咪
5〉事主離開卡拉OK時，有人嗌咪說：「撒啲溪錢，撒啲鹽，送客走！」眾人感到憤怒
