肥佬黎最新搞作《爽報》今日正式出街，為咗迎接呢份免費報面世，八方聽聞肥佬黎今朝6點鐘左右就現身將軍澳印刷廠，親自督師出報紙，睇住《爽報》呢個baby誕生，之後更會去尖沙嘴清真寺個港鐵站出口派報紙，着起件粉藍色嘅爽報背心，落手落腳做埋派報員。唔知大家有冇喺肥佬黎手上攞到《爽報》創刊號呢？
梁繼璋風騷讀新聞
《蘋果》動新聞打破傳統，《爽報》更犀利，係一份既有得睇，又可以「聽」嘅報紙。八方透過特別途徑，除咗睇過《爽報》試版，仲已經試聽過《爽報》，果然係非一般體驗，顛覆八方「睇」報紙多年嘅觀念。為你朗讀《爽報》新聞嘅靚聲「播音員」，包括彭晴、梁繼璋、李志剛，手機即上m.sharpdaily.hk就有得聽。《爽報》除咗新聞，仲有唔少創意之作，例如陶傑嘅專欄《眼兒媚》寫情色小說；牛佬用漫畫同你畫新聞故事。
八方噚晚聽到三人用自己嘅鬼馬方式「聲演」新聞，彭晴扮聲讀國際趣聞，令人感同身受、梁繼璋風騷演繹千人裸泳，相當傳神。三把靚聲都話咁樣讀新聞好得意，梁繼璋話佢哋要令受眾覺得新聞「聽，好過睇」，讀趣聞唔難，反而讀大膽嘅新聞，好似風化案咁，就好有挑戰性啦。八方期待佢哋嘅「聲演」。
「送爽隊」朝朝有驚喜
據《爽報》中人報料，今日起會有一連串送「爽」活動，有幾爽？例如係今日朝早，一行八人嘅「送爽隊」，就會喺香港仔，或者沙田嘅其中一個巴士總站出現，免費請大家搭巴士。咁大家今朝搭車，攞到免費《爽報》之餘，仲有機會免費搭巴士，係咪好爽呢？
《爽報》請搭車外，未來幾日送「爽」活動包括請食早餐、請食點心等等，八方收到料，會第一時間爽快報料。
mailto:[email protected]
