商台前靚女高層楊素珊（Susan）近年搞公關公司之外，仲轉型做埋畫家。近期佢發揮天馬行空創意，斟掂另外7位名人，包括音樂人金培達同填詞人陳少琪等藝能界名人，各自炮製有環保訊息嘅藝術傑作，北上舉行《生息》藝術展。
曾獲金像獎最佳導演嘅林超嘅作品係一條短片；金培達就用咗音樂加相片，做成藝術品參展，安排本月16號至下月2號喺北京今日美術館展覽展出，畀京城中人見識香港嘅藝術家「係得嘅」！
據聞被唐媽媽暱稱「熨斗」嘅廠商會副會長施榮懷，同埋前恒基營業部總經理謝偉銓，喺今個月26號會拉大隊北上為藝術展揭幕，用行動力撐新晉才女。
展覽揭幕前夕，Susan都要鬆一鬆，日前喺專資會會慶上滿場飛，仲同新城cute爆DJMaggie親密合照，證明靚女唔會互相排斥。
