個人電腦PC市場近年受到蘋果iPad等平板電腦侵蝕，反而激起PC界三阿哥聯想集團（992）嘅雄心，為搶走戴爾PC阿二地位，揸重cash嘅聯想積極搵外援，招兵買馬，希望今季圓夢。
今年聯想就搵咗日本仔NEC同德國佬Medion加盟，填補公司喺日本同歐洲版圖嘅缺漏，將公司上半年嘅PC出貨量推高19%，升到1800萬台，仲要係全球五大PC品牌中，唯一連續八季出貨量按年都錄得升幅嘅公司，證明聯想呢招搵外援策略相當成功。
董事長柳傳志已經預言，聯想年底前會做到全球PC阿二，最樂觀今季就可以圓夢。睇番聯想上年稅後利潤增長1.11倍，賺成2.73億美金，證明柳董唔係口出狂言。