今個星期五，政府有幅喺南灣道嘅地皮截標，華華收到風，大美人關之琳趁機將佢喺07年中，以1.13億銀向怡華益新買入嘅南灣道香閨，提高叫價放售。如果成功沽出，唔單止賬面賺2.3至2.6億銀，呎價仲有機會創下南區新高。
每呎叫價逾7萬
之之南灣道16A號嘅香閨，喺正截標幅地皮前面，前臨海景，面積4675方呎，另有1500方呎天台同花園連雙車位。據聞，呢間洋房近年一直暗盤放售，最初叫價2.5億，因應近年超級豪宅造價屢創新高，家陣叫價已經升到3.5億至3.8億，呎價超過7萬蚊。
南灣道一帶係傳統豪宅地段，放盤極少，繼今年初南灣道20至22號屋地，以8.8億元成交，樓面呎價4.7萬，區內屋地幾乎零供應。由於極少放盤，地產代理話，買賣情況十足山頂豪宅，「有錢都買唔到」。今次政府推出南灣道35號地皮，佔地1.44萬方呎，可建樓面約1.3萬方呎，前臨無敵海景，相信有一定叫座力，市場估計造價可以去到5億至5.2億，樓面呎價3.8萬至4萬。
李華華
mailto:[email protected]