本是坐擁2,000名員工的蠟燭廠東主，縱橫商界30年，一場金融風暴令他一無所有。人到中年，他毅然棄商從農，將一片片荒蕪農地，開墾成結滿甜美果實的士多啤梨田。從呼風喚雨的大老闆變成聽天由命的小農夫，彩虹有機農莊的莊主陳天俊坦言，內心從未試過如此舒坦。在漁護署的農業復耕計劃下，近年越來越多人如陳天俊一樣圓其農莊夢。
記者：盧勁業
彩虹有機農莊位於粉嶺鶴藪，種植了士多啤梨、香蕉、魚翅瓜、超甜粟米、迷你西瓜等有機農作物。「塊田荒廢咗30幾年，初初嚟到塊地嗰陣，全部都係成個人咁高嘅野草，嗰陣自己揹住打草機嚟打草。村民以為我搞搞震，後嚟成功開咗塊田種植，村民見到我哋真係種緊嘢，地主見到我嘅誠意，就肯再租多塊地畀我」。陳天俊的農舍由兩萬呎慢慢發展到今天近30萬呎，年產兩萬磅士多啤梨，也是多得他成功取得村民信任。
「冇商場嘅爾虞我詐」
陳天俊由工廠打工做學徒，到在港開設第一間只有10人的工廠，再北上發展到有幾千人的工廠老闆，一場金融風暴令他一無所有。眼見心血盡毀，他把心一橫，決定歸隱田園，「嗰陣真係好大打擊，做咁多年乜都冇晒，耕田可以紓緩壓力，乜都唔使諗，冇商場上面嘅爾虞我詐，好享受田野嘅寧靜」。
回想初初務農只是基於嗜好，毫無經驗的他只想找個後花園種東西減壓，怎料卻讓他種出個未來。「工廠結業後我開始專心種菜，試過喺外國農場摘士多啤梨，所以膽粗粗試下種」。怎料其出產的士多啤梨市場甚受落，有客大讚味道可媲美日本品種每每來幫襯。現時其農場產品甚多元化，有火龍果、還有意大利品種的南瓜，以及全港碩果僅存的水稻田。
「商場如戰場，有好多利益關係，但喺農場只需盼住嘅植物一天一天成長，內心就感到踏實。耕田畀我體驗到，付出唔一定有收穫，但係唔付出，就一定冇收穫」。由陳天俊一手一腳開荒，到今天農場已發展至有七人工作，陳天俊笑言農莊生意頭兩年都是「打個和」，今年開始才有些少收入：「雖然唔會發達，但就夠生活有餘啦！」農作物雖未必賣得好價錢，但結出心靈滿足的果子卻是無價。