今年TGS吸引力唔算大，好多廠商主打作都係舊Game續作，感覺新意欠奉。手提遊戲界反而有更多新意，唔止手機遊戲又多又創新，就連前輩級PSP都唔會放軟手腳，勁Game依然陸續有嚟。好似世嘉咁，就搵嚟紋身女郎着埋T-Back，去谷隻講黑幫風雲嘅《黑豹2》，性感但不令人反感，㗎仔賣Game賣肉始終技高一籌。
記者、攝影：韓繼聰
鳴謝：SCEH
世嘉展館風月味濃
雖屬外傳作品，但《黑豹2：人中之龍阿修羅篇》，依然受世嘉看重，在現場擺放超過20部PSP試玩台。論遊戲，銷量及人氣度不及PS3正傳作品，但保留遊戲內風月場所特色，展館前一班露肉度高嘅ShowGirl，熱褲仔不經意露出疑似T-Back，成班機迷就好似中晒邪咁，乖乖排隊試玩。機能所限，PSP版當然無全3D地圖，換成固定式背景，別有一番風味。今集打鬥招式又多又新奇，玩落算OK爽快，最重要係舞台重返大阪蒼天堀，舊Fans一定更有Feel。
至於3DS，並未讓《芒亨3G》專美，有國民RPG之稱嘅《DQ10》，亦宣佈登陸3DS。展前機迷大多期待可以試玩《DQ10》，而且SE展館放置咗一大隻史萊姆同陸行鳥，以為冇死啦，點知去到只係播放宣傳片，再加一個十周年Corner硬Sell《DQⅠ-Ⅲ》復刻。要我揀最失望位，《DQ10》一定有份！
騷Girl壓軸
手機Game開新血路
除咗傳統電子遊戲之外，電話遊戲亦成為咗TGS另一亮點，今年就多咗好多手機遊戲商加入TGS戰團。日本電話遊戲大哥GREE個攤位，雖喺正人氣爆燈嘅SONY隔籬，但就一啲都唔輸蝕，除有大型CosplayShow吸引男士眼球，主打當然仲有大量手機遊戲俾你試玩，五花八門有成幾十款，真係多到玩唔晒，當然唔少得一堆iPhoneGame啦！有廠商仲為iPhone4加配槍形配件，幾新穎喎。
家用機狂食老本
《無雙》一開四
鬥食老本，Koei嘅《真．三國無雙》一定贏晒，成個攤位都係加強版《猛將傳》，PSV又有《無雙Next》，電腦上網玩又話出隻《無雙Online》，係得隻《無雙VS》玩對戰叫有啲新意，但其實喺十幾年前《無雙》前身已玩過，機迷們又點會有驚喜？
新《Winning》3D射波
《Winning》系列近年氣勢漸被《FIFA》追近，要爭取優勢當然要有新點子，加入3D顯示算係首次，但筆者覺得佢又唔係第一身遊戲，球員丁屎咁細粒，3D效果最多係射波Replay時先較突出，感覺有點多餘。
《重鐵騎》首配Kinect
Capcom首次為Kinect推出遊戲《重鐵騎》，小記跟隨工作人員到會場附近酒店，聽遊戲設計師親自講解呢隻新Game。同一般Kinect休閒遊戲唔同，《重鐵騎》係一款模擬度極高嘅戰爭遊戲，除咗要同外敵戰鬥，更要應付隊員之間矛盾，新鮮度十足，配合Kinect操作，恍如置身戰場！
