靚女影星呢排喺樓市都算活躍，噚日華華講過關之琳想賣南灣道香閨，家就輪到舒淇，佢無懼跌市，喺8月入市買入大埔比華利山別墅獨立屋，售價達1830萬蚊。
嗰度有乜好？據講，比華利山別墅背山面水，風水唔錯；而且隔鄰就係三門仔，有海鮮食，加上係獨立屋，私隱度高，所以好受影星歡迎，早前歌星謝安琪就曾經係比華利山別墅嘅租客。
至於嗰度升值潛力點樣？似乎就唔多掂。今次賣家早於07年以1854.7萬蚊買入，家係以蝕讓近25萬賣畀舒淇，幾年以嚟冇得賺。而舒淇今次買入，係有做銀行按揭。
舒淇近排忙完一輪拍片，終於可以唞唞氣，有時間買屋獎勵吓自己。今年5月佢擔正主角嘅「不再讓你孤單」，係劉偉強為佢度身打造嘅愛情片，講述港女佩如同身患絕症嘅北京員警方鎮東愛情故事。
之前佢同葛優連續拍咗兩部「非誠勿擾」亦大收旺場，賺埋唔少。