體育頻道《ESPN》都可以講係陪住香港人成長，以往直播英超、NBA呢啲大賽，又有黃興桂、江忠德、張丕德等出色嘅評述員；不過我求大俠就收到風，9月之後，ESPN兩個香港頻道now670及671台，將會大削廣東話評述，對香港體育迷真係一個大損失。
ESPN家嘅體育節目都唔算少，好似有最頂級賽車F1、MotoGP；足球方面，又有英格蘭傳統盃賽足總盃，同英格蘭國家隊主場比賽，仲有美式運動好似MLB、NFL等，星期一至星期五就有半小時一集嘅綜合式體育新聞節目「世界體育中心」。
車迷fb撐丹尼爾
不過我求大俠向行家收風，據悉因為now同ESPN續約，但開出價錢就冇以往咁好，ESPN總公司喺美國，受經濟不景，亦都冇以前咁風光，為咗節流就要裁減香港嘅人手同資源。即係話10月後，本地體育迷一樣睇到F1、英足盃等直播，不過世界體育中心就冇晒香港體育新聞。
其實ESPN嘅廣東話評述員，一向又專業又風趣，好似講賽車嘅丹尼爾，成日借啲意插香港政府唔支持賽車運動，都深得車迷歡心，但車迷今年睇埋新加坡站（到時唔知維特爾可唔可以提早衞冕），之後嘅F1就冇得再聽佢把聲。
丹尼爾噚晚同拍檔邢安邦評述MotoGP西班牙站時，就係最後一次合作講呢項頂級電單車賽。丹尼爾喺fb度講：「天下無不散之筵席，如果情況不變，這個周六、日是我嘅MotoGP最後一次旁述，原因一言難盡。」丹尼爾嘅fb戶口，就有幾十位車迷留言支持，睇吓今次群眾力量，可唔可以令電視台收回成名。不過想睇丹尼爾講車，大家都可以睇now嘅車文化，雖然唔係正式比賽，都叫做望梅止渴啦！