細莊上星期同地產代理朋友飯敍，碰啱內地炒樓「富豪」又有動作，我哋嘅話題當然又係圍繞住「富豪」。
話說「富豪」天價買嗰件南區貨，係喺順德人業主嘅幫忙下搵到一間財仔首按貸款兩億半港銀完成咗交易。不過，「富豪」仍然處於財困狀態，所以好快又叫身邊擦鞋仔同律師再次四出搵人做二按。其實金融圈嘅行規，呢類豪宅盤頂多只係做到六成按揭；以呢件貨五億估值計，頂盡可以借三億。家首按已經借咗二億半，「富豪」可以再貸款嘅空間唔多，偏偏佢又想借多億半，結果擦鞋仔同律師們又幫佢搵到幾間財仔夾份借足畀佢。
只可惜「富豪」改唔到壞習慣，收咗quote又喺度扭扭擰擰。結果，繼之前得罪咗一堆銀行之後，家陣又得罪埋一堆財仔，經紀朋友就好擔心佢隨時爆煲。個市已經好明顯回緊，「富豪」就得罪晒所有「水源」，將來如有需要周轉，好大機會冇人願意出手。以「富豪」手上嘅貨按得咁盡，是旦一件俾人CallLoan就會嚟個骨牌效應，一鋪清袋。
細莊唔係好明「富豪」點解成日會咁？經紀朋友就同我講，「富豪」好聽身邊擦鞋仔同律師嘅讒言。其實呢班友只係想收多啲佣金，老點「富豪」拖quote，等佢壓力變大時再說佢借貴錢。講真，細莊對呢啲內地「富豪」並無好感，又睇佢點死。
逢周一刊出