歐債危機除令金融市場動盪非常，更影響銀行間的信任，為了穩定人心，上周四包括歐元區、美國、日本、英國及瑞士在內的五大央行聯手出招，宣佈向歐洲銀行提供3次美元拍賣，擴大資金流動性，希望紓緩歐洲銀行業的美元信貸緊縮問題。
樂觀者話今次多國央行齊齊出手，顯示救市決心，即使無法即時解決問題，但應可見到曙光。悲觀者則會話要勞師動眾咁救市，是否反映歐洲銀行已處於水深火熱之中，迫使各國無辦法唔做嘢。
老實說，銀行業異常複雜，只依靠公司發放的財務報表及資訊，或者一些大行報告，難以判斷歐債問題對行業影響有幾大，好多事根本無法預測，好像當年法興魔童事件後，投行理應加強防範交易員違規交易，但最近又走多個瑞銀魔童出來，因此投資者唔好見央行救市就抱着過高期望。
大家見士佳似乎對前景並不樂觀，但上星期又話已經開始建立好倉，是否有矛盾呢？非也，筆者已明言這次是用來博大反彈，尤其大市上周曾跌穿8月初時恐慌性拋售的底部，會令一班以為唔會再跌的投資者也忍不住斬貨，就算唔斬貨，都會利用衍生工具作對冲，不過，大戶利用此機會入貨托市，過往見怪不怪。
加注要兩手準備
筆者回顧了過去一年一些本地大戶的買賣動向，我估計他們也沒有預料情況會如此急轉直下，既然手上有咁大批貨，如果個市一路直插，他們也無法散貨，只有托高至令人相信危機已過的水平，才有條件將貨派出街。
筆者現時仍待機會加注，如之前所講會有兩個方案，一是見期指升穿19670點，另一個則是待期指跌至17900點至18500點區域，如果嫌太多股票唔知點揀，其實只買大市就可以，怕期指槓桿大，大可買張認購期權，就算博唔中，最大損失亦只係投入的金額，始終熊市最重要還是部署吃長沽這道主菜。
張士佳
寶來證券（香港）資產管理部董事
本欄逢周一、三、五刊出