【曾近榮病逝之告別哥士的先生】哥士的之父曾近榮日前病逝，曾跟他多次合作的星爺周星馳，昨日獲悉曾Sir病逝後大表愕然說：「好可惜。」至於昔日在無綫處境劇《城市故事》中飾演曾Sir兒子洗米華的梁思浩，亦為痛失一位陪港人成長的家事通而深感難過。
曾近榮昔日為周星馳多部電影客串，尤以《逃學威龍》扮演記性差的化學老師最令人印象深刻。記者昨日致電星爺，對於曾Sir病逝，星爺昨在電話中深感愕然說：「我唔知，啱啱先知，我唔喺香港，但都係好可惜嘅事。」星爺指現時正在工作，故不便多言。
思浩嘆息無緣再聚
除星爺外，梁思浩86年亦因為與曾Sir合作拍攝無綫處境劇《城市故事》而建立深厚友誼。當年思浩與曾Sir不約而同首次拍劇，劇中扮演父子，日日見面，感情自然份外深厚。昨日思浩獲悉曾Sir死訊時深感難過，他在電話中說：「第一個反應都幾震驚，兩年前同佢見過面，因為佢幫港台做節目，我見佢一個人喺canteen食早餐，於是陪佢一齊食早餐。兩年前佢同我講話唔做，因為年紀大，我叫佢唔好咁辛苦，佢話舖頭都冇做。嗰次見佢身體都比以前差咗。嗰日我提議成家人（《城市故事》）聚一次，佢話好，叫我聯絡劉淑樺、溫兆倫，但佢（曾Sir）最後都冇打番畀我，估唔到呢次亦係我見佢嘅最後一面。」
終生學習助人解困
思浩表示跟曾Sir相處了一段很長時間，當年真的視曾Sir如父親般尊敬。思浩說：「我當咗佢係我爸爸，好多人覺得佢好嚴肅，少講嘢，但實際上唔係，佢其實係一個幾開心、幾搞笑嘅人，佢唔係外表咁cool，但同佢相處一定要好主動，佢好鍾意後輩錫佢同尊敬佢。以前我哋就算放工之後都約埋成班人一齊聚會，燒嘢食或者戶外旅行，後期各有各忙，少咗見面。我非常欣賞佢終生學習嘅態度，當年喺港台見佢成日坐喺canteen睇書，因為要解答聽眾家事問題。曾Sir離世，我同全香港人一樣覺得好可惜，因為少咗一個陪大家由細到大嘅家事常識專家。」
家事專家愛惜舊物
身為曾Sir港台同事的車淑梅，昔日經常向曾Sir請教家事常識，昨日聞得噩耗時亦心情沉痛。淑梅說：「我一路都有麻煩佢，向佢請教家事常識，佢好人到將一啲清潔劑入喺個樽仔擺喺港台畀我，我見成日麻煩佢，諗住封番封利是畀佢，點知佢堅持唔肯收，我見佢平時用開個暖水壺咁舊，於是買咗個暖水壺畀佢，佢好開心咁收咗，點知用唔夠一、兩次，佢又用番舊嗰個。我覺得全港人都要多謝曾Sir，曾經幫我哋解決過咁多家事上嘅問題。」
採訪：戴彩煥
只能回味：家事常識句句金
‧你用少少哥士的，溝水，一抹就搞掂啦。
‧呢位觀眾問呢，關於玻璃污糟嘅問題，用哥士的我講過好多次啦，一抹就清晒嘅。
‧條渠塞咗？可以用哥士的。
‧呢個係咩東西呢？原來……
‧嗱，你去化工原料行……
‧你去買混合膠，即係兩支細細支嘅膠水，記住要動作快，一開每樣一半混合埋一齊，記住要快呀！好快乾㗎！
‧嗱！抽油煙機呢，好易咋，用除油浸迹粉，加少少溫水開稀……
‧你呢，等夜晚屋企人瞓晒啦，你就戴手套，整咗佢，聽朝就有得用㗎啦。
話你知：哥士的停不了
曾近榮早年在家事節目中經常提議用哥士的（氫氧化鈉）來通渠除垢，其腐蝕性強和價錢相宜是曾Sir推介的原因之一，亦令哥士的為香港人所熟悉。近年科技發展，曾Sir已少用哥士的，不過他在電台節目依然有介紹哥士的的用法，以下是他的貼士。
除草叢狗糞味：氫氧化鈉具腐蝕性，用時應注意安全，先戴上手套，用膠盆裝四匙氫氧化鈉，再加入3湯碗熱水倒在地面，用竹掃把輕刷。
清潔水渠：將一匙氫氧化鈉加入一湯碗熱水開稀，慢慢倒入水渠，但只適用於膠或鐵造的水渠，鋁質並不適合。
禁絕樹根生長：如榕樹根生入圍牆會令牆身爆裂，曾Sir建議先用鋒利鋼鋸片輕鋸樹根，再倒入氫氧化鈉，樹根立即停止生長。
洗手盆淤塞：先在洗手盆放1/3盆水，再用膠泵抽動幾下，以四匙氫氧化鈉開入兩湯碗半暖水在膠盆開勻，分四次倒入盆中，半小時後冲水即可。
資料來源：香港電台節目《住家男人》
