東京遊戲展2011（三之二）五大作爭收視　3DS加Stick屠龍

東京遊戲展2011（三之二）
五大作爭收視　3DS加Stick屠龍

雖則話今年TGS人氣被SONYPSV搶晒，但一班軟件商都唔係省油的燈，個個都花足心思，務求吸住觀眾眼球。而Capcom除為旗下名作擺出七大戰區外，更為任天堂3DS加入右方Joystick配件，讓大家打《芒亨》屠龍時更得心應手！

記者、攝影：韓繼聰

1.新Parts有得睇無得使
《MonsterHunter3G》

■Capcom特意為3DS打造嘅「右方Joystick」，賣相有點騎呢，不過屠龍時轉換目標及視點將更就手。

大廠Capcom一向係TGS風頭躉，今年一樣傾盡全力，唔俾PSV專美。七大戰區各有主題，配合番自家猛作，各展館擁獨立風格，如《戰國Basara3宴》同《Biohazard：Revelations》就分別佈置成和風小屋同恐怖郵輪，試玩之餘享受埋氣氛，讚！
矚目度最高當然係百萬大作《MonsterHunter3G》，展館跟番遊戲內嘅丹基亞港嚟設計，排隊試玩人數比PSV不遑多讓，玩完仲有「芒亨」斜孭袋送。筆者排完一輪隊試玩，雖未算「芒亨」Fans，但精細畫面及獨有裸視3D，越玩越上癮。可能試玩區不設「右Stick」配件關係，加上我哋挑戰中級難度水龍，身邊同隊嘅赤木小姐，就指手畫腳話比前作難玩好多！

1.

■上方有裸視3D芒，下方就係隊友、狀態等資訊，好方便。

■圖像加入霧化等特效，感覺畫面比Wii版更靚。

2.重點擊破後猛攻
《FFXIII-2》

對比幾個月前E3所公佈嘅版本，今次TGS最重要消息係鐵定12月15日推出，兼且有埋雷光限定PS3套裝，黑色機身配鮮色圖案，跟之前白色限定版互相輝映，不過中文版就未知幾時出。TGS內已有多台試玩機座，喺XB360館連隊都唔使排就有得玩。以新男主角試玩，畫面比舊作有少少進步，戰鬥仍保留「破防系統」，重點擊破後猛攻，相當有快感。

2.

■XB360館大把機，唔使排長龍等試玩。

■初玩感覺，好像沒舊作要不停轉陣式咁複雜。

3.SONY貓參戰
《街霸×鐵拳》

為免跟自家《UMVC3》對撼，今次Capcom公佈《街霸×鐵拳》新消息唔算多，但卻搶眼非常！面對《鐵拳》系列出名騎呢嘅大熊角色，今勻《街霸》系有一對SONY貓登場，學晒阿隆嘅波昇絕技，惡搞得嚟又好鬼可愛！唔知手短腳短又細粒，攻擊判定會否同樣騎呢？

3.

■將經典2D同3D格鬥名作融合一起，絕對考驗Capcom功力。

■黑白SONY貓惡搞登場，當然只限PS3同PSV版本。

4.用念力睇車
《ForzaMotorsport4》

難得SONY新機發佈再無「長期支票」《GT》出嚟搞局，令XB360獨佔嘅《ForzaMotorsport4》格外受注目。現場試玩加入4條日本傳奇賽道，包括茂木、FujimiKaido、筑波同鈴木，㗎仔應該玩得更親切。透過力谷嘅Kinect，仲可學絕地武士咁用念力「隔空」扭轉愛車，作多角度觀賞。

4.

■Kinect讓玩家可隔空轉動靚車。

■加入勁多2011新車，以及一堆GT改裝辣跑。

5.但丁轉型唔Take嘢
《DevilMayCry5》

轉交英國工作室開發後，少年但丁外形設計成索K蠱惑仔，俾Fans鬧到狗血淋頭。廠方順應民意改造型，將但丁變番「似個人」，雖仍帶點邪氣，但總算順眼得多。會場內雖只有新宣傳片，但仍有不少人駐足觀看，全拜但丁手中古靈精怪武器，以及複雜多變嘅Combo連技所吸引。

5.

■新武器巨型鐮刀，睇宣傳片應該會着埋火。

a.Capcom陣地嘅一角，唔好以為好悶咁，其他戰區超精采！

b.廠方更擺下兩層樓高巨龍模型，相當有氣勢。

c.可能試玩不設「右方Joystick」配件，赤木小姐話今集難玩咗。