古有匡衡鑿壁偷光，今有室內設計師拆牆打造半開放式廚房，只為開揚？膚淺！走訪美孚700呎大號單位，半開放式廚房既方便一家之「煮」邊煮邊睇電視，更可監察細路在客廳一舉一動，一舉兩得！
記者：朱崇德
攝影：林栢鈞
Model：Rika、Dominic@GME
查詢：Zaradesign（21523238）
廚房變監察室
開放式廚房可以話係近年興起「發水樓」呢個名詞之後，好多業主為偷天換日而為之嘅概念！條橋好多人玩過，不過就無資深室內設計師Jimmy玩得咁精打細算：「原本只有七八十呎嘅廚房，四面牆只有一個丁方兩呎小氣窗，感覺侷促，喺對正廳中心位置嘅牆身，開一個八呎長條玻璃窗，除多咗通透感，感覺空間闊了，最重要係佢接連客廳十幾呎闊無敵巨窗台，感覺劃一連貫，又可引入室外陽光！」八呎長窗拉闊到可直望街景，闊度更上一層樓。這個半開放式廚房仲有個實際用途，置身其中的雪櫃剛好對正客廳電視，雪櫃頂放一對無線喇叭，入廚時，閂埋門一樣有電視汁幫你撈飯，仲係畫聲俱備；更重要係屋主剛有小朋友出世，半開放式廚房同時化身「全天候監察室」，所以話，好嘅室內設計，功能與美感渾然天成。
拆眼鏡房二開四
設計師將原有眼鏡房拆掉變四房，何苦要全屋扑牆咁大陣仗？「眼鏡房拆掉後，打通變成連廁所主人套房、各有七八十呎嘅BB房及工作間，不過最重要係玄關位變多了一間雜物房，令屋內雜物多了一個統一收納空間！」隨便喺全屋走一圈，竟發現大部份房間都用上趟門設計：「因為拆晒原裝牆，房門就可以收喺間隔假牆身中間，視線無阻隔，出入房間又唔使就位，感覺更開闊自然。」不過我就更Buy房與房之間的分隔，非採用傳統石膏板偷薄式設計，而是以功能至上的一整幅收納櫃取代；據聞戶主夫婦係走訪世界三十多國嘅旅遊發燒友，一屋戰利品完全收納得妥妥貼貼，再加上HomeOffice文件，如此大量「濕星嘢」放喺七百呎單位，仍能營造出闊落感，就是設計功力所在。
單位：美孚新邨700呎
裝修連家具：$40餘萬