政務司司長唐英年去馬走勢越來越明朗，唐營中人幾乎日日開腔造勢，不過就冇乜邊個講得出唐唐實際上有咩過人之處，就連唐媽媽尤淑圻噚日被問到囝囝有乜嘢優點可以擔當特首時，竟然回答：「我唔清楚呀。」吓﹖連10月懷胎生佢出嚟嘅人都噏唔出有乜好，如果唐唐真係做到特首，港人認真要自求多福喇。
唔知個仔有乜優勢
唐唐有何優勢連阿媽都諗唔到，咁行政會議召集人梁振英咪好易威脅到其「儲君」之位﹖唐媽媽笑笑口話：「公平競爭啦，大家睇吓邊個有料就邊個。」唉，問你又講唔出個仔有乜好，又話有料嗰個做特首，八方真係聽唔出唐媽媽究竟係倒個仔米，定係幫緊口拉票。
其實唐唐鋪路做特首經年，當年接任財政司司長時，政圈已對佢競逐第三屆特首看高一線，當時唐媽媽受訪時咁講，唔希望囝囝做特首，皆因眼見老董做特首受盡千夫所指，作為媽媽嘅梗係唔忍心見到個仔受呢種苦啦。唔知唐媽媽家心態有冇轉變，佢一句「唔清楚」唔通係要曲線勸退唐唐？
唐營中人呢幾日係咁打開口牌，話唐唐係下屆特首不二之選，不過大家同唐媽媽一樣，唔係好講到唐唐有乜優點值得港人支持，好似全國政協常委陳永棋盛讚唐唐「腳頭好」。
容永棋挺唐離奇
另一支持者，香港專業及資深行政人員協會創會會長容永棋仲離奇，話有一晚禱告時受到神嘅感召，所以決定支持唐唐喎。共產黨奉行無神論，容生靠神「收風」得到感召支持唐唐，唔係太天真，就係太儍，或者畀靈感佢」另有其「神」，位列北京領導人，否則恐怕唔係幾靠得住，事關係人都知特首小圈子選舉，最終都係由阿爺欽點，滿天神佛都要靠邊站，如果選特首要天人感應，不如搵埋黃大仙、車公、觀音幫吓眼，外加玲玲、峰峰、李師傅及龍師傅等本地四大玄學家指點迷津，八方保證香港人心服口服，唔會麻煩大陸。
mailto:[email protected]