東京遊戲展2011（三之一）搶玩PSV　宅男愛掃背

東京遊戲展2011（三之一）
搶玩PSV　宅男愛掃背

㗎仔都幾勁，事隔311地震半年，又再Show照搞、機照打！一年一度嘅東京遊戲展好似不受影響，喺幕張會場繼續舉行，而單單SONY一款PSVita，足令現場氣氛升溫，除因規格強勁又有大堆頭Game支援，創新輕觸式機背設計，幾隻手指掃吓掃吓咁，更係玩到班㗎仔宅男投入非常。

記者、攝影：韓繼聰
鳴謝：SCEH

雙Touch！輕觸屏幕＋掃背操控

雖然SONY喺五月E3遊戲展，已公佈PlaystationVita（PSV）基本情報，但要實地拎上手試玩，梗係留番畀本土GameShow啦。今年嚟到東京遊戲展（TGS），進場後梗係第一時間撲去SCE展館，點解沿途好似冷清清無乜人？原來人群一早蜂擁聚集晒喺PSV根據地！現場設有多款將發售新Games試玩，每隻Game都早已排滿人龍，短龍就排30分鐘，熱門大作就要排成粒幾鐘。話雖如此，機迷、宅男全都好規矩好有耐性，乖乖等候玩PSV，而SCE就請嚟大量靚女，一對一咁好女僕Feel地教班機迷打機，示範PSV掃背同體感操控。拎上手試玩，5"屏幕比PSP大得多，視覺效果更震撼，最有驚喜係輕觸屏幕同掃背操控，爽快過好多貴價Android手機。
暫時雖只有少數遊戲支援掃背操控，但玩過嘅機迷無一不讚，如背景會跟隨手指升起或凹陷，玩時感覺真係好得意，唔怪得機迷排咁耐隊都無詐型啦。

■有姐姐教掃背打機，唔使玩到手忙腳亂。

■未推出已展示10款新色機殼。

■仲可即場試埋影相同拍片。

26款遊戲同步推出

PSV已宣佈12月17日推出，除支援facebook、Skype、NicoNico外，首發護航遊戲亦有成26款，SCE仲話有八十幾款趕工開發緊，陸繼有嚟。而跟機推出嘅新Game，不乏一堆名作Title，好似《真．三國無雙Next》、《塊魂》、《RidgeRacer》等都有即場試玩，嚟緊仲有《街霸×鐵拳》、《高達ExtremeVS》、《Uncharted》等人氣勁Games，令PSV前景更光明。