新立法會大樓飯堂招標一波三折，大樓入伙之日，個飯堂都仲未搞掂，而附近商場嘅食肆已幾乎飽和，所以成班議員、議員助理同立法會職員都好擔心搬屋之後「冇啖好食」。
為解決問題，秘書處「欽點」19間立法會「御用」食肆，噚日將食肆餐單同食肆外賣電話，email畀議員，等大家日後可以叫外賣醫肚。呢19間食肆如今貴為新立法會大樓嘅「御用」外賣部，如果做得好食，獲得立法會班大哥大姐賞識，勢必唔憂做。
邊19間欽點食肆咁巴閉先？名單上包括翠華、魚米家、喇沙皇、明珠越南、泰之味、天荷坊、潮苑、滋味軒、榮式、日溢、聘珍樓、鹵八鵝、名軒。向來識食嘅民主黨立法會議員李華明講，明珠越南嘅越南菜相當得，而翠華嘅各項食物水準都唔錯，呢個外賣名單，收貨。