有哥士的之父之稱的曾近榮近日不幸病逝，當年他主持過不少節目為市民大眾解決家事難題，此外亦有拍攝劇集和電影，令人印象深刻，發出會心微笑，他的離世藝人和觀眾均感惋惜。
張智霖：對男仔嚟講對曾Sir一定好有印象，因為佢成日都教人整嘢，哥士的係一定會記得嘅，多謝佢教我哋咁多知識。
楊千嬅：我同曾Sir冇合作過，但佢畀我嘅印象就係好多家事常識都幫到手，真係學到唔少嘢，當然佢教人用哥士的呢招印象最深刻，佢過身都好突然。
唐寧：細個時同曾Sir見過面，佢成日教人整家居嘅嘢，佢個人好風趣，可以將一啲好沉悶嘅嘢，講得好有趣，睇佢節目一啲都唔會悶。
陳柏宇：當年有個機會接受曾Sir主持嘅節目做訪問，咁啱當日我一個人搬出嚟住，好多家居嘢搞唔掂，即場問曾Sir，佢好樂意解答我嘅問題，個人好nice。
街坊陳：我以前都有睇佢嘅節目，佢教嘅嘢都幾實用，當然最有印象就係曾Sir教人用哥士的，佢嘅形象好深入民心，家離開咗當然可惜。
街坊劉：曾Sir好出名，最出名就梗係教人用哥士的，咁叻嘅人走咗梗係好可惜嘅，家香港都冇乜呢類專家。
街坊黃：我知邊個係曾近榮，我亦有睇過佢教人解決家居疑難嘅節目，不過自己就冇跟住去做，我知道佢最出名最叻就係教人整嘢。
