香港拍賣市場越嚟越興旺，遠到瑞士蘇黎世嘅SwissAuctions拍賣行都嚟搵食，下月5日喺麗思卡爾頓酒店舉行該行全球首個鐘錶拍賣會，300件各國名錶，總估值達1.87億元。
一講到百達翡麗、勞力士、愛彼錶、卡地亞等國際知名腕錶品牌，大家都好熟悉，以貴出名，而全場焦點拍品係百達翡麗18K黃金三問小三針腕錶，型號5079J，估價300萬元。該錶鑲有39粒寶石，配上18k原廠黃金錶扣。拍賣行指自從百達翡麗型號5079停產後，呢個型號就成為收藏家追捧對象。
八方反而留意一款JaquetDroz雀籠座鐘，有晒時、分針，最特別鳥籠內置咗六首音樂，可設定30分、整點同隨時啟動播放，籠入邊嘅雀就會隨住音樂郁動。雀籠用鍍金精銅打造，隻雀啲毛仲係來自各式禽鳥嘅真毛，難怪估值成263萬。