網名馬草泥嘅「人民力量」任亮憲揚言區選落黃大仙狙擊工聯會「票后」嫻姐，近日喺該區就有人通街張貼馬草泥成立男權組織「驕陽」嘅宣傳單張，打正旗號「為受寃屈的男士發聲」。
馬草泥早前涉強姦被捕，律政司最終決定不作起訴，宣傳單張寫到明「作為過來人，本人深明男士在風化案中所受到的不公平待遇」，仲以「女人幾滴眼淚可以令男人萬劫不復」作口號。八方起初以為馬草泥為選舉不惜擺自己上枱，搞個與某壯陽藥同名嘅組織博宣傳，但原來係俾人惡搞。馬草泥話對呢個「創作」唔反感，亦願意接受大眾批評，不過如果有人盜用人民力量個logo就要譴責，仲揚言要搵出幕後黑手喎。