活地阿倫的《情迷夜巴黎》真叫我嘻哈絕倒！活在今天荷李活的男主角一直嚮往20年代的巴黎，因為美國文學界的頭臉人物，如海明威、費茲哲羅、史坦均雲集花都，還有畢加索、達利、艾利略……一一在電影中亮相，好不熱鬧。
男主角還愛上了虛構的畢加索女友，一切都叫男主角留下來，之後二人誤打誤撞走進18世紀末的巴黎，連第昔加和高更都遇上。
哈，這回輪到畢加索女友心目中的黃金年代，她決定留下。對了，我們景仰20年代的巴黎，活在20年代的巴黎人卻認為再早幾十年的巴黎才稀罕，每個年代總有人在懷舊，問題係懷那個年代的舊。
像足球，總有人嚮往比自己年代更早的人，先父在生時常跟我們說：「大頭仔胡國雄邊算好波，李惠堂、姚卓賢就真係好波喇！」哥哥與我當時都報以噓聲，無他，連睇都冇睇過，點會相信？最重要嘅係，70年代兩個10歲、8歲嘅細路，心目中邊有人好波得過胡國雄㗎！真係睬我老竇都儍，睇足球我學懂了江山代有人才出，絕不懷舊！
唯一真係有諗過嘅係，網球界猛將代代有，法國有ReneLacoste，他最當打是1925-29那幾年，除了還未開辦的澳網，3大滿貫都是他的囊中物。
英國代表有FredPerry（佩利），他的黃金時期係1933-36，係該期的4大滿貫得主。澳洲有RodLaver（利華），若果網球手最彪炳不過贏取4大滿貫，一季內贏取4項錦標聽上去都難，起碼費達拿都未試過，但他老人家分別在62年及69年，兩次一年內全捧4隻獎盃，至今前無古人，後亦未有來者。
美國代表多不勝數，干納斯、森柏斯、阿加斯都一時無倆，若果今年的迪祖高域進入時光機，與全盛期的前輩打番場，邊個輸邊個贏，你邊個夠膽講？
文：盧覓雪