梁思浩今年7月與梁榮忠在書展打對台，其間忠仔忽然帶隊踩思浩場，結果被思浩fans大罵抽水。原來思浩為此事嬲爆忠仔，大前晚他在now節目中坦言：「我都有啲嬲，你問佢點解要咁做？」此外，思浩又勁踩崔建邦做主持酬勞不值6萬一集。
梁思浩今年5月被港台炒魷，由梁榮忠頂替他主持節目《瘋Show快活人》。事隔兩個月，思浩與忠仔同在灣仔書展搞簽名會，其間忠仔拉隊到思浩攤檔踩場，被思浩fans大罵抽水。
拒由忠仔訪問
思浩對忠仔當日抽水極不滿，大前晚他接受now《102觀星總部》主持王賢誌訪問時說：「你同事（忠仔）點解激嬲我啲fans？嗰日其實我都有啲嬲，你問佢點解要咁做？我嗰3本書全數撥捐慈善機構，行入書展已經同佢打咗招呼，記者叫我行埋fans度，突然有一團人衝過嚟話：『送本書畀你。』我啲fans梗係嬲，佢哋話：『抽水、車震、返屋企搵番自己部車啦。』第二日報紙出嚟話梁榮忠抽水，完全冇提慈善。」
王賢誌問思浩是否不滿焦點落在忠仔踩場事件上，思浩說：「係，想問吓佢點解要咁做。」其時王賢誌大爆思浩不欲當晚節目由忠仔來訪問他，思浩聞言尷尬笑說：「呢句你都講埋！」
辣埋司徒法正
談到有傳now以6萬元一集力邀崔建邦做主持，思浩聞言失笑說：「唔值囉，我好大膽講，畀佢嗰個都黐線嘅！如果崔建邦都6萬一集，我諗我價錢唔止呢個！」
對於思浩的不滿，忠仔前晚在《102觀星總部》解釋他只是按書展傳統跟其他作者交換作品：「我用相同方法，得出結果同自己想像唔同，唔好意思，原來各處鄉村各處例。」而司徒法正前晚任忠仔節目嘉賓，對思浩不滿他當年開拍《怪談》電影時起他飛腳，司徒法正都不明所以。
另外，思浩日前為有線《怪談．靈異直播》拍外景，並要扮乞丐，為演好角色，思浩事前還重溫黎耀祥的《低一點的天空》偷師。
採訪：林妃