一向鬧人唔使本的蘇施黃（阿蘇），今趟化身旅遊親善大使，帶來自澳洲的14歲小廚神Jack食勻港九新界地道美食，日前阿蘇由中環殺到跑馬地，食大牌檔、點心、脆皮糯米雞，再去家品店、名車陳列室……全日行程好似阿蘇話齋真係「人都癲」，但阿蘇卻樂此不疲，Jack有阿蘇的貼心領航，六日食盡、玩盡香港，香港真係蘇Good。
撰文：溫敏芝
蘇施黃08年的飲食節目《蘇Good》搞到一班師奶晚晚跟住去買餸，最近阿蘇再出招，為台灣壹電視拍攝飲食節目《阿蘇出駕》，今次介紹的不只香港食肆，會全面推介在外國人眼中想吃、想玩及得意的地方，節目暫定分六至十集播出。節目男主角是參加澳洲《做個小廚神》（JuniorMasterchefAustralia）比賽、奪得第二名的14歲小廚神Jack。Jack與父母日前從澳洲來港六日，跟阿蘇去了布袋澳、山頂、遊船河等港九新界食肆及好玩的地方。
貪得意踢毽懷舊
日前阿蘇帶Jack及其父母，由中環歌賦街出發，街頭食到街尾，之後再殺落跑馬地，沿途有阿蘇及好友金燕玲充當領航大臣作介紹。拍攝當日大隊先在西餐廳Gough40品嚐羊肉、沙律，再到大牌檔勝香園食馳名的番茄牛肉湯通粉、檸蜜脆脆；其間又在家品店HOMELESS逛個圈，Jack選購一個飲管眼鏡，之後還搞笑地用來喝橙汁。走進歌賦街這條百年老街，Jack在街頭試玩了香港懷舊玩意踢毽，與工作人員玩得不亦樂乎，露出一臉童真稚氣。
之後，阿蘇帶Jack品嚐中環具懷舊氣息的蔗汁店，大夥兒喝過後，轉戰跑馬地英皇駿景酒店的「駿景軒」嘆點心，阿蘇大讚這裏的叉燒包、蝦餃是全港三甲。言談間，阿蘇得悉Jack的dreamcar是跑車品牌AstonMartin，隨即帶他到跑馬地的AstonMartin陳列室，讓Jack一嘗坐上DreamCar「DB9」的滋味，可惜他還有兩年才夠16歲考車牌。
難頂榴槤臭豆腐
接着，阿蘇偕Jack再返回中環具懷舊風味的「陸羽茶室」，更安排Jack跟茶室的禤師傅做脆皮糯米雞，看見繁複的過程，令Jack大開眼界。之後大隊往陸羽隔鄰的「一樂食館」，品嚐了馳名的燒鵝瀨粉。阿蘇與Jack相處數天，發覺他敢於嘗試各種食物，連榴槤、臭豆腐都肯試，阿蘇說：「佢話兩樣都唔好食，但係就好鍾意食海鮮，魚、蝦和蟹，不過我哋遊船河，佢就唔舒服暈船浪，我哋畀支白花油佢，佢搽完即刻知道係好嘢袋住㖭。」
切磋廚藝讚窩心
這位14歲的小廚神Jack來頭絕不簡單，連一向嘴刁的阿蘇都驚嘆其廚藝，阿蘇說：「之前我去塔斯曼尼亞拍嘢，出發前一晚睇到Jack個final比賽，佢輸咗得第二名真係唔抵，佢應該攞冠軍，我嗰晚都瞓唔着，漏夜即刻上網想搵Jack，我都係臨上機前先收到佢電話，佢即刻答應幫我拍嘢，我仲問Jack可唔可以煮嘢我食，佢話yes，真係sosweet，之後佢嚟咗我住嘅酒店，煮咗清雞湯、三文魚、茶薰鵪鶉，真係好好食。」為了回禮，阿蘇已準備在港為Jack下廚做一餐晚飯，包括洋葱鴨、牛肉包、酸青瓜、苦瓜炒牛肉及薑葱蝦煲等。
驚嘆14歲Jack滿肚煮意
14歲的Jack下廚比賽如大師傅，阿蘇說：「我覺得佢對食物知識好我好多，以一個14歲嘅人有咁豐富知識係難能可貴，我56歲食咗56年嘢，亦去過世界各地咁多地方食嘢，我都係30幾歲先開始叫做識食嘢，我頭嗰30年食嘢係為咗飽，30幾歲先欣賞食物，難得佢14歲已經識欣賞食物。」
自嘲少時一竅不通
原來Jack愛上下廚是10歲時看了一齣電影《茱莉對茱莉亞－隔代廚神》（Julie&Julia）深受影響，其次是Jack小時仍未入學，已在媽媽身旁幫手下廚，當作是一個遊戲。自小已有廚藝天份，將來又會否當廚師？Jack說：「或許會。」Jack年紀輕輕已成名，阿蘇回想起自己14歲的那年，不禁冷笑一下，對煮食可說一竅不通，阿蘇說：「直至大學，我都唔係真正識煮嘢，大學嗰時有個佳句，『唔煮冇得食，煮咗好難食』，我家啲大學朋友都話：『阿蘇唔係嘛，你煮嘢？幾鬼難食呀。』」
姓名：Jack
年齡：14歲
威水史：參加澳洲《做個小廚神》比賽獲第二名
《蘇Good》下月回歸無綫
阿蘇在烹飪上也有啟蒙老師，就是她的家廚何翩，阿蘇說：「細個唔鍾意讀書，成日去廚房玩，睇何翩煮嘢，睇人煮就好易，自己煮要經過好多錯誤，每煮一樣嘢都要學，我都用咗10幾年，直至何翩退休返咗大陸，我自己都40幾歲，我都仲問佢補緊習。」
阿蘇之前的兩集《蘇Good》大受歡迎，下月阿蘇主持的《京都蘇Good》會在無綫播出。
推廣京都
阿蘇表示311日本大地震後也想為日本做點事，加上她一早已被當地封為「京都國際旅遊領航大臣」，自己又很喜歡京都，於是與當地縣政府、市長洽談拍一輯京都特輯，令港人認識京都的可愛之處。