【北京直擊】前緋聞男女黎明和章子怡前晚手拖手在北京睇騷，二人台前蹺手玩換位，台後親密肩並肩，黎明更自爆找章子怡合作拍電影，一人寫一半劇本，但提到老婆樂基兒，卻繼續不理嬌妻埋怨，封口不談。
章子怡、黎明、趙薇、黃曉明和人氣急升的韓國型男車勝元等，前晚在北京出席男裝品牌ErmenegildoZegna派對。會場外塞滿300多人圍觀，更有人爬上圍牆睇熱鬧，公安在場外封路疏導。
一個劇本兩份寫
黎明和章子怡拍攝電影《梅蘭芳》期間曾傳緋聞，前晚兩人不避嫌十指緊扣入場，當司儀要求兩人分開影單人相，兩人手蹺手如跳舞般轉位，親暱非常，章子怡笑不攏嘴，其後在場內，章子怡更倚實黎明睇騷。黎明說：「唔係好耐冇見，頒獎禮都有見過。」何時再合作？他說：「我同佢講咗，一人寫一半劇本嚟合作，題材就未諗，因為近期工作忙，要宣傳電影，又要12月喺紅館開演唱會。」他透露雖然在紅館開過多次騷，但仍享受和台下觀眾互動的感覺，暫定12月5日開騷。
問黎明有甚麼突破？他即發揮金句王本色：「你講呢，就悶；我講呢，就會誇。」其妻樂基兒早前指有關兩人的婚姻生活，要叫黎明發言，他即說：「打排球呀？其實（答問題）都係工作，知道藝人同傳媒都辛苦，希望香港娛樂圈多啲嘢發生。」問到何時生BB，黎明就以私事為由，繼續拒絕作答。
趙薇曉明喜相逢
另一對前緋聞男女趙薇和黃曉明，一樣手拖手入場，趙薇在場內更把玩黃曉明的墨鏡。趙薇透露《畫皮2》差不多竣工，她說：「仲有一場去西藏拍。」早前被踢爆和周迅爭戲兼爭凳鬧不和，趙薇聞言微笑說：「沒有這回事！」
採訪、攝影：葉雪