何苦強求 - 左丁山

何苦強求 - 左丁山

一位家長為咗個仔中一入學,入唔到英皇書院,死要硬頸,不願接受事實,爬上天橋要生要死,令灣仔上中環嘅交通大擠塞,沙田陳太坐在的士內,司機破口大駡示威者隨便阻路,令佢地冇啖好食。陳太喊:「係唔係示威者霸佔馬路呀,還是別有原因?」司機話:「唔×知,總之邊個故意阻塞交通,我就××××」,陳太為之搖頭,塞車二十分鐘,聽足粗口二十分鐘,既受塞車之苦,耳朵又要受罪。有一個世界性調查話香港的士服務在全世界排最佳第三名,仲好過日本,都唔知可不可信。
上星期日在馬場廂房,披圖請嚟嘅客人,不少係英皇書院校友,講起家長夾硬嚟之事,大家苦笑,但一位朋友指出,硬頸家長位公子考第十名(據報道),相信即使英皇唔係被教育局逼令縮班,都未必入到英皇啩?左丁山笑曰:「嗱,他日若英皇校友梁兄哥做到特首,不如請英皇校友林超英做教育局長,由佢負責將官立中學擴班,擴到連小學考第二十嘅子弟都有得入英皇,到時『梁特首』嘅民望必然上升。」不過咁,假如這會是真的,必然有好多中中冇人讀,或要殺校,令民主派主導嘅教協必然上街示威,與「梁特首」死過!
香港教育就係咁矛盾㗎嘞,不服從市場規律行事而要人為調控,必然製造矛盾,引發衝突。疑似特首候選人唐先生會見以沈旭輝為首之RoundTable,聽取意見時,據說有人係咁意提吓學券制(schoolvoucher),即刻被其他人大力反對,你話「唐特首」聽得邊個講?

家長望子成龍,乃人之常情,成龍之前,當然想入名校,但入到名校又唔等於他日成龍嘅啫。今天學生被派往Band3中中,大概相當於梁振英入英皇之時,其他學生入威靈頓、基教、模範……呢啲學校咪一樣有大學校長與大賓架培育到出嚟!老實講,當年入到英皇等於必入港大,幾乎似係自動波,但梁振英居然入咗香港工專(即理工大學前身),他日真的昂然進入禮賓府居住嘅話,政壇成就遠勝天子門生大婆仔㖭。