易有伍再創LPCD傳奇　迷戀黑膠味

易有伍再創LPCD傳奇　迷戀黑膠味

當下音樂，只講求官能享受，高頻要有刺耳快感，低頻要有心跳震撼。回歸現實，你有無諗過，究竟何謂具吸引力嘅音樂？今日訪問到LPCD發明人易有伍先生，旗下發燒作品多不勝數，最新剛推出嘅M2錄音技術，更作出多方面修正；由06年至今，錄音專用嘅軟硬件已相繼升級，然而錄音師嘅功力才最重要。佢話，只有重返黑膠年代，才有靚嘅音樂。

記者：陳國輝
攝影：譚盈傑
Model：Rika@GME
鳴謝：DavidLee

堅持音樂感　不求高清

由易有伍親自研發嘅LPCD，屬製碟技術之一，以直刻母帶為基礎，特點係無經過多重壓製工序，因此亦無所謂損耗問題，做到真正嘅原汁原味。但面對市場上最流行、最熱賣嘅日本製HQCD，究竟兩者間有乜分別？易生話：「HQCD重視嘅係高清品質，例如樂器嘅細緻度、人聲嘅清晰度，而LPCD就追求真實嘅音樂感。」簡單例子，如人聲嘅呼吸位，又或者彈奏樂器時產生嘅微弱撞擊聲，LPCD會將其全部保留，相反，HQCD則會清洗得一乾二淨！「你話邊樣好啲？老實講，沒客觀標準，好似電影內嘅爆炸聲，有人鍾意數碼製作嘅SoundEffect，認為夠震撼，亦有人喜歡現場收音，啱Key與否，因人而異。」

■藝術家總是主觀、有堅持，易就對㗎仔力谷嘅HQCD有所保留。

■易所創嘅LPCD制式，雖則出道5年，但其實研究多年。

■易有伍任錄音師近25年，中港發燒友無人不識，更創立LPCD。

■在籌備中嘅雜錦碟內，就成功將鄭伊健調出發燒級靚聲。

完全消除兼容問題

講番最新錄音技術LPCDM2，喺製作上，最大特色係搵咗不同線材來錄製各類型音樂。佢舉個例，如錄製張學友音樂，就需要搵力量型嘅線材來輔助，軟件方面，則採用可消除母帶內電子噪音嘅技術，令音色更接近原音效果；但講到跟上一代最大分別，就係由原本嘅直刻技術，改為可每次複製1,000張嘅壓碟方式！好處除效率比以往提高，更重要係不論新舊CD機，全部都兼容到，比起早期LPCD45規限CDR的讀碟方式，明顯方便咗好多傳統CD發燒友。

■約五百呎錄音室，塞滿各式錄音設備。

■視乎音樂屬於力量或柔和型，錄音時將配不同線材。

■呢部用鋁帶發聲嘅喇叭，相信好多人都未見過。

■首張完成但沒有發行嘅LPCD，彌足珍貴。

珍藏喇叭　愛上80'sCello

打開門，入到易有伍嘅「基地」，你唔會覺得呢度似擺放高級音響嘅HiFi房！直接啲講，呢度實情係佢私人工作間，總面積約四、五百平方呎，擠滿各式各樣喇叭，每一件都係經典珍藏，例如放置在兩旁，像積木搭出嚟嘅「巴黎鐵塔」，原來係美國老牌子Sequerra，其中仲有以鋁帶發聲嘅高中音喇叭，絕對估佢唔到！但佢至愛，似乎都係80年代購入嘅Cello擴音機，當時買入價14萬，但現在已經同樓價一樣飛升！易生話，佢最鍾意係質感非常細緻，而且內櫳設計精密，可惜小記點睇都係毫無感覺，惟有自嘲唔識貨。

■勁似巴黎鐵塔嘅美國老牌子Sequerra喇叭。

■初期LPCD45採用藍底塗層，現改成銀色。

■易生至愛之一嘅Cello擴音機。

■想達到低沉厚實嘅感覺，就要搵膽機輔助。

M2新碟曝光（每款約$170）

奧地利著名作曲家Bruckner，透過LPCDM2重新錄音，重現個人交響樂曲特色。喜歡聽小提琴音樂，則可選擇Respighi的《TheBirds&ThreeBotticelliPictures》，亦屬出名嘅古典樂派作品。

蔡琴悅耳歌聲，例牌又係發燒友必聽極品。83年首度推出嘅《傷心小站》，除可欣賞蔡琴那得天獨厚聲線，還有簡單嘅結他背樂，感覺樸實；《此情可待》幾乎係同期作品，以情為主題，透過蔡琴低沉而優雅嘅嗓音更添感情。

鍾情外國流行曲，第一、二輯《BestSoundCollection》肯定啱你。如百聽不厭嘅AirSupply作品《TheOneThatYouLove》，以及Kansas的《DustInTheWind》等，經易有伍重新錄音，感覺換然一新。另一款經典中國純音樂《梁祝．黃河》，以小提琴版重現，發燒友必聽！

以自家品牌推出嘅作品中，《2011原音精選》屬今年HiFiShow限定品，由易有伍親自製作，包括有蔡琴《其實你不懂我的心》以及林子祥《每一個晚上》。至於《發燒碟》系列，以紀念LPCD45II及LPCDM2誕生為主。另一新作則為雨果唱片成立25周年紀念版，也值得珍藏。

將於十月才發行嘅《至尊金曲》，大家也可先睹為快！內容收錄咗80及90年代多張經典流行專輯，例如有張信哲《等待》、彭羚《給我唱過的男孩們》以及蔡楓華《絕對空虛》等，全屬耳熟能詳之作。