藍天白雲，閃閃波光下兩隻海獅劃過長空。海獅Darling忍不住㩒住海獅Honey個頭係咁錫。「咦~Honey你唔好咁心急啦！俾人見到又影相又拍片，上晒YouTube啦！」噢！不好意思，新居天台花園太靚，飛越人群目中無人，實在太High之過啫。
記者、攝影：陳慧敏
鳴謝：TokyoConvention&VisitorsBureau
全城圍 海獅錫錫
自從去年9月1日Sunshine國際水族館閉館大裝修，今年8月4日終於又喺商場頂重開。現在館裏有超過700個品種共37,000隻海洋生物，每日都勁多旅客專登來看我們在閃閃令水色下飛翔的樣子。仲有好多新鄰居搬入，假日閒閒地排隊一小時。不過在商場裏有冷氣還好啦。而且若二人同行來，買包含觀光塔入場券的套票，每人可省約$28。好多拖友拍住拖來看我同Darling。
全新！
飛天True獅Show
最新最爆梗係我同Honey的新舞台啦！成個天使之環般座落花園廣場中央，設計師話想我們在「繁榮的東京都會的空中飛翔」。旁邊還有個白沙灘，但我們好少去。你見我哋兩公婆日日在直徑8米，離地2.3米的水槽上繞圈，好似好悶好鬱結。其實我哋每日睇住大人細路同拖友，拿住相機頭岳岳，我哋散步、發吽哣同打架都引來成班Fans叫住「Kawaii」追住。有時我忍唔住同老婆纏綿，就引來成村人靜晒一路影相又拍片。咁衰！等我忽然來個U-Turn，你班人又跟住來Turn喎，玩弄你們於股掌之間！但最嬲係下晝表演時間，睇住同伴們在台上倒立就有魚食，雖然話我哋日日輪流站崗啫！但我都好想食呀！不過我哋每日5點就收工返大水槽啦！你要嚟探我就趁早喎！
再新！
水母時光隧道
另外仲有班新住客。班水母個時光隧道都係新裝㗎，環境仲好潮好靚，成個未來世界咁。全藍色，成班水母同我哋一樣在人類的頭頂上飛。最末段那個半圓形潛望鏡看得像時光隧道，望得他們頭岳岳。望住佢哋條螢光的、波點或Seethough「裙」仔反吓反吓好過癮呀！
又係新！
240噸水槽漫遊
仲有，班深海魚那邊個水槽增加到240噸，係以前的兩倍。雖然還是比你們海洋公園的細（你哋嗰個有2千噸呀陰功！），但個無敵大電視連看台，阿巨型魔鬼魚都好識做，成日飛過大屏幕，一日仲有八場潛水員與魔鬼魚的水中「芭蕾」餵飯，都吸引好多人圍坐同影相的。
Seethough懶鬼企鵝國
除此之外，仲有兩個Seethough水池，住有家香港好紅的企鵝，同好少見的塘鵝。唔知點解班香港人成日想影佢哋跳水相。唔使等啦，佢哋好懶，夜晚仲好早瞓，就算企喺崖邊「釣魚」都好少跌落水。你哋一係晨早10點半、12點半或下午茶時間再來吧，餵飯時牠們才會較混亂郁吓。而塘鵝池真可見到牠們潛水覓食時，嘴下面個袋在水底𠺘𠺘吓的神秘畫面。可愛的大耳狐都係每日瞓瞓瞓，好似好乖咁。其實佢哋凌晨就發癲在籠裏四圍「飆」，好鬼頑皮㗎！
a.Sunshine國際水族館
地址：東京都豐島區東池袋3-1
電話：（81）0339893331
交通：東池袋駅6或7號出口步行約3分鐘
入場費：約$181
網頁： http://www.sunshinecity.co.jp/sunshine/aquarium/
綱吉之湯女伴游
「5點收工，Honey我哋去嘆吓啦。」Darling看完介紹台場大江戶溫泉的旅遊特輯就這樣說。那個在市中心以大江戶時代為題，100%正宗溫泉主題園區，大抵好多旅客都去過了吧！除了有齊露天同室內溫泉外，還有熱沙浴、魚仔浴等溫泉池。隨着季節變換，江戶城現在大抵開始紅葉片片，泡到混身暖暖在漫天燈籠下吃碗傳統拉麵感覺挺好的。而且每日6時過後入場費減達$90，抵呀！
早兩年旁邊還開了專給小貓小狗去的「綱吉之湯」！德川綱吉是位極愛狗的儍瓜將軍，當年為狗狗起了間比民居還豪華的住宅而惹民怨。溫泉裏除了室內外溫泉池，每位貴賓貓狗都有專業的潛水「伴游」，同貓仔狗仔在池裏玩遊戲同冲凉。還有全身海泥按摩同美容服務，又有嘢食，雖然舖仔細細但服務拍得住人們去玩的大江戶！不過，人哋話俾貓狗去咋喎，海獅去得咩？
b.大江戶溫泉物語
地址：東京都江東區青海2-3-6
電話：（81）0355001126
收費：6時前一般價格大人約$270、小童約$160
網頁： http://www.ooedoonsen.jp
c.大江戶溫泉物園別館綱吉之湯
地址：東京都江東區青海2-3-6
電話：（81）0335202744
收費：半小時約$320起
網頁： http://www.tsunayoshi.jp
2000日圓可是2000年才出的新鈔，理由就係正值千禧年用番2,000円新鈔，同時寓意日本10年經濟低潮結束，經濟復蘇。紙幣上有沖繩守禮門。
TravelMemo
持BNO護照或特區護照均免簽證。日本領事館：25221184
東京香格里拉酒店WISH．forJapan套餐，連二人早餐、免費使用健身室及Wi-Fi，房價10%更撥捐災區幫助災民，DeluxeRoom每晚約$4,344起。
查詢： http://www.shangri-la.com/en/property/tokyo/shangrila
由即日起至10月30日前訂購香港東京經濟客位機票，票價由$3,500起。查詢： http://www.cathaypacific.com（國泰航空）
110V，兩扁腳插座
1港元兌9.9日圓
下周天陰，24至34℃
