日前剛39歲生日的潮媽陳慧琳（Kelly），前晚在中環出席時裝騷，力壓一眾年輕女星如JaniceMan和陳嘉桓等。Kelly笑指生日收到兩歲兒子蝦餃仔的濕吻祝賀，一家三口平淡溫馨在家拍照切蛋糕。即將復出拍片的她，更無意效法張栢芝帶囝囝開工客串。
今個月開學，潮媽陳慧琳暫時放下心愛蝦餃仔劉昇，努力復工，密密出job。她前晚在中環出席名牌Anteprima的2011秋冬時裝騷，穿上一身黑色新裝，同場還有JaniceMan、陳嘉桓、女模Jocelyn和鐘表美女胡敏珊等。大前日39歲生日的Kelly，更獲設計師荻野泉送上手袋做生日禮物。
夫送花送蛋糕
Kelly表示生日沒大事慶祝：「好平淡咁喺屋企同老公、囝囝影相切蛋糕，個仔仲開心過自己生日。」問她囝囝送甚麼禮物，Kelly由心笑出來：「送咗濕吻，佢成口口水咁錫埋嚟，老公就送咗花、蛋糕。」Kelly生日願望是最簡單的身體健康，問她不想造人成功？她說：「準備中，有咗我會講畀大家聽。我遲啲都會拍電影，自從阿仔出世後，已經三年冇正式拍戲，ohmygod，原來咁耐，10月會開工。」
由於Kelly接拍的新片《八星抱喜》主要在香港取景，她毋須出埠，加上是時裝輕鬆笑片，所以決定接拍，至於會否效法張栢芝帶仔客串演出？Kelly說：「唔會，佢盞搞亂劇組。其實我冇所謂，Alex（老公劉建浩）唔係太想，所以暫時唔會。」不想拍片期間懷孕？她說：「都OK，都係兩個星期啫。」
兒子獲老師讚
Kelly疼錫蝦餃仔，更被指縱壞囝囝，她則心痛說：「我係唔打仔，係講道理，佢EQ好高，講道理佢會明白。」更指囝囝返學已沒再喊，老師更讚他表現OK，但近日感冒請假幾天。
採訪：顏英儀
攝影：林德雄
