現年35歲嘅梁詠琪（GiGi）同舊愛鄭伊健分手後，曾先後戀上兩位老外，但始終搵唔到真命天子。
GiGi早排先同喺美國駐港總領事館做嘢嘅外籍男友Matthew分手，佢火速撫平傷痛，日前出席公開活動時春風滿臉，問佢係咪又蜜運？GiGi故作神秘甜笑話：「我不嬲笑得甜，感情事要畀時間我計劃，順其自然，始終要專心工作，我滿足現狀。」GiGi言語間似暗示自己又墮愛河。
「靚女多人追」
近日有個香港導演喺北京醉爆GiGi年底趕做兔年新娘，個導演仲話：「佢（指GiGi）同嗰個男友（指Matthew）分咗手，但肯定係同一個外籍男友結婚。」就婚訊求證GiGi，佢經理人阿詩噚日代答：「唔係，佢年底前工作排到滿晒。」問GiGi家係咪拍緊拖？阿詩話：「靚女梗係多人追。」據知GiGi真係蜜運中，佢嘅新歡都係老外，因為戀情啱啱開始，佢要好好保護另一半，所以盡量避談感情事。