柳俊江肖雞，兔年冲太歲，運勢多變。由去年底離開新聞界，在網誌發表「車衣女工」論，到成為獨立電影《哭喪女》男主角，現身娛樂版，如此劇變，不過是七個多月的事，流年預測果然應驗。記者轉行做公關、當主持甚至從政的大有人在，然演戲幾乎前無古人，或許同行已經出了一位會撳錢的黃婉曼，更可能只是我妒忌心作祟，惹人猜疑此舉是否想在娛樂圈走紅，他卻說，「我無呢個條件！」
撰文：蔡俊業
攝影：陳盛臣、楊錦文
柳俊江：
30歲，人稱柳爺。00年入讀浸大傳理學院，主修廣播新聞；02年加入無綫電視新聞部當實習記者，後轉為全職，一做8年，去年底離職；現為香港愛護動物協會中國外展總監；間中兼任主持人、自由撰稿人及演員。
貪心．成就
柳俊江在《哭喪女》飾演男主角阿恒，一個坐在輪椅上的宅男，他說這個角色是從旁觀者角度看他的女朋友，即飾演全職哭喪女的詩雅遇上靈異事件後的變化。導演是城大創意媒體學院的導師許雅舒，她的學生，同為導演的麥曦茵將許介紹予柳俊江，自此促成前主播處男下海演戲。「我哋喺Cafe坐低傾，傾完之後導演就話：『係你做啦喎！』我話：『做咪做囉！』」雖說是獨立電影，但女主角詩雅，以及飾演社工和醫生的陳家樂和湯怡三位都是全職藝人，電影開鏡儀式同樣有娛記在場，導演和演員一字排開任影，選角和宣傳都「踩界」得如一部商業製作，難怪一般觀眾會誤會：咦？呢個咪報新聞嘅？乜走去拍戲呀？傳媒同行包括我在內的震撼更深，畢竟娛樂圈賣的是另一種專業。「演戲對我嚟講，只不過係為興趣。」這跟曾偉雄的「黑影論」一樣，誰會信？「以前做無綫都會有人問我係唔係想紅啦，一做幕前就有呢個問題，到家有人問係咪想入娛樂圈，我都話唔係；想紅，係要豁出去，投資時間、放低工作，我有家庭、有負擔，亦都已經建立起形象，沒有條件豁出去！」他承認自己很貪心，但並非物質上，而是尋找生命意義上，「我的『貪心』建基於對知識的渴求、謙虛聆聽兩種因素；做人唔驚貪心，最驚係太易滿足，如果人生最大成就只係我以往嘅採訪經歷，去過做地震採訪，咁即係已經過去咗，家咪好可悲？我覺得我仲未搵到！」
他直言貪玩，甚麼都想試，而且自信滿滿，不會有事情把他難倒。這樣，他手執未來鑰匙，嘗試打開每道通往未來的大門，投身愛護動物行列、主持節目、做棟篤笑、寫書，還有演戲。「任職愛護動物協會，絕對可以做到好有意義，甚至改變內地好多人（對動物）的思想態度、文化及質素，幫到好多小動物，呢樣可能會成為我人生中一個好Remarkable嘅成就。」至於拍戲，他不相信自己會有甚麼成就。「入行要放低自己，我做唔到，同埋自問外表條件一般，有自知之明嘅人唔會發明星夢。」好歹都是一代新聞王子，昂藏六尺，鏡頭前迷倒不少女粉絲，如今竟然自嘲！
自卑．平等
五年前到無綫當實習記者，跟柳俊江成為同事；那時他長駐內地，難得碰頭閒聊一會，已感到他話語間總帶着高傲。到今次訪問，他坦白說出底蘊。「其實我唔係十分有自信，我啲中學同學就知道，近幾年叫做有好大改變。」生於基層家庭，金錢兩個字對他一家五口來說從來都是一個難題，求學時代很多興趣班都無法參加，只有不停打籃球，放學就搵地方Hea、打機、吹水。到高中時更是他人生第一個低潮──父母同時失業。「窮到要攞綜援，而且維持咗一段長時間，屋企關係變得唔好，自己又反叛，覺得我得唔到應有嘅成長環境，會同同學比，嗰個年代每個屋企都有部電腦啦，我到中七先有，我直情有諗過去參加嗰啲電腦捐贈計劃，去攞部二手電腦。」如此環境中長大，人就變得心急，「成日都好煩第日會點，又會諗可唔可以快啲搵到錢去改變環境？所以做好多嘢都無計劃，只信緣份，想做就去做。」
緣份是咁來的，會考只得15分，讀文科入大學沒甚麼科目選擇，最後鎖定浸大傳理學院；揀主修科目，自知英文不好，又嫌中文新聞太悶，只剩廣播新聞，結果高考2B2C，錄取與否還要看面試，他卻直達天庭，「我嗰陣時講嘢黐脷筋，如果要面試就應該入唔到；我問教授，佢話：『係喎，In漏咗你㖭！』否則，我就會讀中文系，走去教書。」大學將以往成績重新洗牌，置身平等環境，他發現就算家住公屋，普通中學畢業，到外面也不會比名校出身或家住豪宅的輸蝕，「跟同學開會、做Project、搞活動，我都可以做個領導角色，原來過去咗嘅嘢就係過去咗，去到新地方，自己嘅背景，只係一啲磨練。」他又為改善黐脷筋下了很多苦功，每晚用錄音機錄低自己的讀報聲，反覆細聽，逐粒音執正，「通常係『S』音，『死』、『知』、『癡』呢啲音好難改，就試用唔同方法，再讀多幾個版本，一日練一隻字係咁講，用咗一年時間去改。」由二年級實習前開始，直到08年京奧後終於當上主播，「一定要對自己有要求，你先可以改善到。」
車衣．新聞
在無綫新聞部八年，最後一年多時間晉升主播，又擔任《新聞透視》主持，就算後來轉職至公共事務部依舊可報新聞，收入和知名度有增無減。然後，他在網誌發表《我離開了我愛的崗位》，文中對現時新聞部老闆意見過份強勢，令記者只能「照單執藥」難以發揮，變成「車衣女工」，一次經歷成轉捩點。當時在《星期日檔案》，花個多月籌劃採訪廣州保衞粵語行動，做齊功課，受訪者也有了，「但上頭唔批，原來佢哋覺得普通話係國家法定語言，無必要做一個動作去保護廣東話，我好錯愕，係咪已經政治正確到咁？係咪成個傳媒出問題？相信唔只我見到，但點解無人講？」「車衣女工」博文在facebook瘋傳，繼而有報章報道。不過，行內行外確有意見認為，舊公司給予如此多機會，才造就今天的柳俊江，如今離職前卻公開踩公司一腳。「開頭真係好大壓力，無諗過咁大回響，擔心影響到舊公司，亦可能有好多人不滿。但我想強調：第一，我唔係『唱』，第二我係討論緊成個新聞行業嘅文化，我講緊係呢間公司我見到背後發生嘅情況，有可能導致成個行業越走越差。無綫新聞部入面都係成個行業嘅縮影，你會睇到成個行業點樣發展落去，呢個唔只關係到公司業績，亦唔只關乎到新聞機構嘅表現，而係一個社會問題，小朋友每日睇咩資訊？大人談論甚麼話題？成個社會文化點樣轉變？係影響整個香港嘅未來走向。」
現在，柳俊江仍有很多機會與舊行家聯絡或在facebook交流，他發覺大家對這件事都很正面，因為帶出了記者待遇的問題，及討論何謂真正的新聞自由。他近月更變成了業界意見「代表」，一些關乎新聞自由議題的事，都會找他評論。譬如早前上VDONext講亞視誤報江澤民死訊、李克強到君悅酒店期間，記者只能在另一間房看直播，他在微博轉載在場記者所講「Theongullestassignmentoftheyear！」（Ongullest為廣東話粗口「最戇X」的英文諧音），但他坦言希望能夠逐步抽離，擺脫這種身份。「我既不在其位，又不是專家、學者，我也不從屬業內工會，我是innopositiontocomment。」他現時最期望的，是大眾能夠多點留意他在愛護動物協會的內地工作，包括領養寵物代替購買以及推動內地防止虐待動物的法例等議題。
柳爺
柳爺此名最傳奇。「我係一個粗枝大葉嘅記者，初入無綫兩三年，成日有啲小錯，尤其係對數字，珠寶失竊案六百萬，寫稿寫錯六千萬；出去採訪又自把自為，又唔聽話，於是主任打嚟：『叫聲你柳爺，合作少少啦！』提醒我細心番，跟同事合作好啲！」
