馬季開鑼，旺丁旺財，入場人數與投注額都有雙位數字增長，馬會諸公笑逐顏開必矣。因曾特首人在歐洲，署理特首唐英年到場主持打鑼禮，唐司長以前係馬會董事兼大馬主，入到沙田馬場特別親切嘅，現屆馬會董事范徐麗泰對記者講到出口，話如果唐司長宣佈競選特首，佢一定唔參選，直情就係支持者之一啦。今年特首盃編在第三場舉行，跑完第一場突然有傾盆大雨，點知到咗第三場雨過天青，白日當空，等唐司長可以在無瓦遮頭嘅草地頒獎，讓廣大馬迷一睹佢嘅風采，而有咁啱得咁蹺，左丁山貼士話「小橋流水」可勝，點知鬥後勁唔夠隻「時尚風采」衝，只得第二。一名馬迷竟然對左丁山講：「唐司長家族做邊行㗎？製衣、紡織吖嗎，最着重時尚，佢嚟頒獎盃俾『時尚風采』馬主，好兆頭呀！」
咁都得？一位疑似對手振英哥就捧英皇書院校友披圖梁場，特登走上廂房賀披圖生日，披圖請咗不少英皇仔，個個稱兄道弟，披圖話CY呢位同學仔對香港有承擔，有感情，有深厚認識，對解決香港房屋問題學有專精，係上佳CE人選，CY做CE，誰曰不宜？廂房內班英皇校友當然齊齊拍掌歡呼，來一張賀壽大合照。財經報紙社長M大讚CY有料，而社長M嘅老闆F亦係英皇校友。股票名家天真許與陸叔亦然，呢股校友勢力都幾大㗎。唐英年好似係在外國讀書嘅，呢方面差些少。
CY逗留一小時後，吃過生日蛋糕，要趕下場，準備去見沈旭輝主持嘅RoundTable，與新一輩後起之秀交換意見。同一時間，老總P已來短訊，催促左丁山上VM廂房見議員L，好彩由第二座看台嘅七樓行過去第一座看台嘅十樓，幾近啫，三分鐘便到。見到議員L，向佢取笑：「成個準商務局長款噃！」議員L大笑，學吓一啲時尚人士咁口吻：「我願意考慮為香港市民服務嘅！」跟住就叫我哋為一隻新馬嘅名字發表意見。講馬好過講政治啦，議員L啲馬，隻隻奇妙隻隻有獎金收，做馬主做到佢咁，開心到震。