九月十二日「蘋果」李八方有馬場特寫，四位疑似特首候選人皆現身馬場，難怪乜版記者都紮住馬在沙田會員看台大門口影相兼追訪。四隻馬邊隻會入閘呢，范太已經講明佢唔會參賽，葉劉即使報名，亦似係陪跑分子啫，於是變成萬眾預期嘅雙英會，套用方駿暉金句：單打獨鬥，潛質優秀，雙英鬥足一條直路，以電眼分勝負嘅話，屈居亞軍者，怕有排抖氣先至會復元。
李八方話振英哥揸住本厚書入場，唔多老利噃！其實唔係，振英哥到披圖嘅生日派對，吃過自助餐，逗留咗成個鐘先至走，臨走之前，瑞士信貸亞洲區（日本以外）首席經濟分析師、董事總經理陶冬送一本書俾振英哥參考，書名「經濟大轉型」，所以佢咪拎埋走囉。唱生日歌之前，披圖講佢有三本書出版咗，叫大家買嚟睇吓，CY立即話：「喺馬場唔好講書書聲。」披圖就冇所謂呀，講「書」一樣贏，特首盃嗰場佢大聲嗌，叫廂房內老友買「時尚風采」，結果以十倍勝出，真係信者得救。
左丁山隨後走上VM廂房，一坐低就俾退休賓架R捉住，佢話最近「蘋果」財經版專文猛批馬會，好唔客氣，有好多老友認為係左丁山用另一個筆名寫嘅，或者係提供資料。嘩，咁講唔掂噃，左丁山連忙澄清：「寃枉呀，蘋果內有名筆不少，線眼眾多，駛乜搵左丁山俾料呀。嗰版在報界，有個外號，叫做『蔡東豪租界』由蔡生管轄，其他人不得干預，你地慣咗將壹仔宗菁華啲嘢入左丁山數，家又將蔡東豪租界大作入左丁山數，我邊有咁多隻手寫稿呀，如果真係我執筆，入馬場都冇時間啦！」
賓架R似乎半信半疑，左丁山對佢講：「蔡東豪咁出名，你間大寶號以前可能同佢間公司有往來嘅啫，你自己去問吓啦！」
賓架R於是講番下一場馬，返回正題，左丁山上半場掛住傾，輸咗一半籌碼，好彩曾在本欄俾過貼士嘅「醒目精英」與「皇帝法令」順利勝出，左丁山亦因此反敗為勝，馬季開鑼第一日就贏，意頭幾好呀！