由踏入會場一刻，睇住各大車廠派出不同型號的電車及混能車接載記者代步，大大感受到即使你幾唔接受呢類新能源車，始終亦有妥協一日，不得不承認環保車就是汽車界未來！各大車廠在新一屆車展繼續發電波，好似Volkswagen的三號場館就被環保小車up!搶盡風頭，呢場未來綠色戰提早爆發，名副其實是一場大混戰。
記者、攝影：許維雅
鳴謝：VolkswagenHK
小車身大革命up!
up!以打造一架人人買得起的生活小車作概念，宣佈正式量產發售，哈哈笑鬼面罩夠可愛，跟兩年前法蘭克福車展首亮相的e．up概念車相若。有機會來港的當然是whiteup!及blackup!，備有65匹及75匹馬力的1公升汽油引擎，更加入BlueMotion的Start/Stop停車熄匙功能，令油耗低至4.2L/100km，二氧化碳排放更低於100克。不過要Up起環保潮，當然唔少得以天然氣引擎推動的eco．up!，還有預計2013年推出的電動版e．up!。加埋高性能GTup!、四驅crossup!及開篷up!等概念車，真係up到你暈。
外形及車名都充滿創意玩味，玩符號又玩食字，入門版叫takeup!、舒適版叫moveup!、頂級版叫highup!，為方便你TakeUp，入門價更低於一萬歐元，並將於今年年尾推出歐洲市場。小車更配備不同種類的up!boxes方便應付日常需要，創意十足又抵玩的實用小車，要攻陷年輕人市場絕對勝算在握。
好似機械人NILS
將e．up概念車變成量產車後，VW另一電動概念車NILS首次登場。利用大量鋁合金打造的單座車，車重只得460公斤，未來科幻感超重的外形前後同樣搶眼。電動馬達可輸出20.1匹馬力及13.2kg-m扭力，極速130km/h，電池可持續行65公里，雖然將會量產的機會極微，但可觀性甚高。
其他混戰士
講到汽車綠色環保戰，今年除有大量純電新車發難晒冷外，當然唔少得一堆半油半電的混能車，歐日品牌均有代表作戰顯示車廠的科技實力。
